Laboratory Equipment sem

Mizoram sawrkar-a School Education Department chuan kum 2025 ‘Zirtîrtute Ni’ (Teachers’ Day) denchhenin nimin khan Mizoram-a HSLC Exam Centre 105 leh HSSLC Exam Centre 15 hnênah Scientific Laboratory Equipment an sem a, heng bungrua semna hun Aizawl Treasury Square-a School Education Directorate tual-ah neih ah School Education Department-a Special Secretary David Lalthantluanga chuan School changtlunna tûr leh zirlaite hmasâwnna tûrin sawrkâr chuan theihtâwp a chhuah thu a sawi a; Scientific Laboratory Equipment-te hi zirlaite tâna tangkai leh an thiamnate tipungtu a nih ngei a beisei thu a sawi a. Zirtîrtu indaihlohna phuhrûk nân zirtirtu lâk belh tum mêk a nih thu a sawi bawk.

He hunah hian School Education Secretary Angela Zothanpuii chuan COVID-19 hripui len hnuah Scientific Laboratory Equipment hi sem a la nih loh thu sawiin, tun tumah hian Microscope 150, Analytical balance 30, Meter bridge 75, Prism 635, Ammeter 635, Rheostat 381, Burette 635, Conical Flask 635, Beaker 635, Measuring Cylinder 635, Test Tube 2540, Glass Slab 635, Concave Lens 635, Convex Lens 635 leh Spirit Lamp 381 te semchhuah a ni.