Lengpui Airport chungchang ah AAI in rawtna mumal tak an neih hun an nghak mek tih sawi

Chief Minister Lalduhoma chuan Lengpui Airport enkawl dan turah Airport Authority of India (AAI) in rawtna mumal tak an neih hun an nghak mek tih a sawi.

Sawrkar laipui-a Ministry of Civil Aviation bultumin nimin khan Arunachal Pradesh Legislative Assembly-a Dorjee Khandu Auditorium-ah North East Region Minister’s Conference on Civil Aviation neih a ni a, he hunah hian Mizoram atangin Chief Minister Lalduhoma chu telin rawtna hrang hrang a thlen a. Chief Minister chuan Lengpui Airport enkawl dan turah Indian Air Force in an rawtna an thehluh tawh thu sawiin, “Airport Authority of India lam hian rawtna a la rawn nei ve lo thung a, rawtna mumal tak an rawn neih hun hi kan nghah mek,” a ti a. AAI Chairman Vipin Kumar IAS chuan Ministry of Home Affairs leh Ministry of Civil Aviation te nen Meeting neia an bawhzui mek thu leh AAI lam hian September thla laihawlah chuan rawtna mumal tak an thlen theih tur thu a sawi a. Chief Minister chuan Airport ram hi AAI hnenah chuan Mizoram Land Revenue Act, 2013 in a phal angin Lease a pek theih a nih thu leh Mizoram Sawrkar in Airport atana sum tam tak a lo sen tawh chu AAI in an la dawn anih chuan reimburse ve tura a beisei thu a tarlang a. Thlai thar phurhchhuahna tura Lengpui Airport-a Cargo Hub leh Cold Storage Facility neih chungchang a thlen pawh AAI in Lengpui Airport an lak chhawn hunah a keng tel thei dawn tih an hrilh a ni.

Union Minister for Civil Aviation Rammohan Naidu Kinjarapu-a hova he thutkhawm ah hian Chief Minister Lalduhoma chuan Lunglei District leh Champhai District-ah Greenfield Airport mamawhna a sang hle tih pawh sawiin, heng Airport pahnih dinna tura hmalakna hmasa atan Pre-Feasibility Study nei turin DoNER-ah thehluh a ni tawh tih a sawi a. Union Minister chuan Ministry of Civil Aviation-ah rawtna thehlut zawk tura rawnin, thla khat chhungin Pre-Feasibilty Study hi neih a nih tur thu a hrilh bawk.

Regional Connectivity Scheme (RCS - UDAN) hnuaiah October, 2025 atang hian Pawan Hans Helicopter Service kan neih belh dawn tih Chief Minister chuan sawiin, Aizawl to Champhai, Aizawl to Lawngtlai, Aizawl to Parva bakah Aizawl to Silchar leh Churachandpur te a thlawk dawn tih a sawi a, Aizawl to Parva route chu customer an tam tawk dawn loh avangin route danga thlak tura thlenin, Helicopter service pawh tun aia ti tam lehzual tura ngenna a thlen a. an lo ennawn tur thu an sawi a ni. Hei bakah hian Tui chunga tum thei chi thlawhna (seaplane) service tir theihna tur hmunhma pathum pali emaw vel Mizoramin a neih thu thlenin Proposal thehlut tura tih niin MoCA hian Pre-Feasibility Study an nei zui dawn a. Kolkata – Aizawl thlawhna chuanman sang leh Aizawl – Kolkata leh Aizawl – Delhi Thlawhna tihpun a tul thu pawh thlenin, Union Minister leh a team te hian IndiGo lam an lo biak tur thu an sawi bawk a ni.