Kum kalta ah Mizoram tlawhtu 5,24,784 an awm

Sawrkar kum kalta 2024-2025 chhung khan zinmi (tourist) 5,24,784 in Mizoram an rawn tlawh a, an zinga mi 5,18,873 te chu ramchhung mi niin midang 5,911 te chu ramdangmi an ni.

Tourism Department hotute sawi danin kum 2023-2024 nena khaikhinin kum kalta 2024-2025 chhunga Mizoram rawn tlawhtu zinmite hi za zela 139.50 zetin an pung a ni. Kum 5 kalta kum 2020-21 atanga kum 2024-25 inkar chhung khan Mizoram hi zinmi 11,19,086-in an tlawh a. An zinga mi 13,953 te chu India ram pawn atanga Mizoram rawn tlawhtute an ni.

Hetianga Mizoram tlawhtu zinmi an pun mek lai leh ramchhung a cheng tam takin an tlawh mek lai hian ramdang atanga rawn tlawhtu erawh an tlem chho telh telh dawn nia rinna lian tak a awm a. Hei hi ramdang mite'n Mizoram leh Myanmar ramri depa awm State, Manipur leh Nagaland te an duh thala an rawn tlawh phalsakna kum 14 zet kalpui tawh chu nikum December thla atanga khuahkhirh thar leh a nih tak vang a ni a. Ramdang, a bikin United States, United Kingdom leh Israel ram atanga Mizorama lo zin tum tam tak chu thawnlet an ni bawk.