Home Minister in Mobile Forensic Vehicle vailiam

Sawrkar laipui in cheng vbc. 4.818 senga Mizoram tana Mobile Forensic Vehicle a lei te chu nimin khan Directorate of Forensic Science Laboratory kawt atangin Home Minister K. Sapdanga chuan a vailiam.

Heng Motor te hi a bik taka duan niin a chhungah hian Forensic Evidence pawimawh hrang hrang lakkhawmna tur hmanraw pawimawh tak tak awmin Motor leina sum hi kumin August thla khan pek tlak a ni.

Nimin-a heng Motor vailiamna hunah hian Home Minister K. Sapdanga chuan July ni 1, 2024 atanga India ram a hman tan tak Criminal Law thar Bharatiya Nagarik Suraksha Sanhita, (BNSS) 2023 chuan Forensic lam hnuchhuina a dah pawimawh thu leh Dan tharah kum 7 chin chunglam hrem theihna reng reng eng pawi khawihna ah pawh Forensic expert in a endik a ngaih thu a sawi a. Forensic lamin an tih tur a hun taka an tih chat chat theih nan Sawrkar laipui chuan State/UT tin FSL tih changtlunna turin khawl pawimawh leina tur (Machineries & Equipment) leh pawikhawihna hmun thlen zung zung theihna tur Mobile Forensic Vehicle (MFV) leina tur sum a ruahman sak a. Mizoram FSL pawh khawl pawimawh 15 leina tur cheng vbc. 6.13 leh Mobile Forensic Vehicle 10 leina tur a rawn pe tih a sawi a ni.

Tun dinhmunah Directorate of Forensic Science Laboratory, Mizoram New Capital Complex hnuaiah District Mobile Forensic Unit, Aizawl, Lunglei leh Champhaiah hawn a ni a, thawktu tur mithiamte pawh lak thuai an ni anga, District dangah pawh hawn belh zel tura hmalak a ni anga. Tunah hian Director T. Lalropuia hovin Expert 14 an awm mek a. Anni hian pawi khawihna hmun a awmin Mizoram hmun hrang hrangah an kal thin a, Laboratory-ah an exam leh a, Law Court-ah expert testimony an pe thin a a ni.