India aiawh thei tur zawngin EMS kalpui mek a ni tih sawi

India in kum 2036-a Olympic thleng tura hma a lakna kal mekah India aiawh thei tur Mizo thalai tam tak zawng chhuak turin Empowering Mizoram Sports kalpui mek a ni tih Chief Minister Lalduhoma chuan a sawi.

Mizoram Rifles Association ten an thlen 12th North East Championship Shooting Championship, 2025 kharna inkhawm Inrinni kaltaa Thara Resorts, Falkland Veng-a buatsaih a hmanpuina ah he thu hi sawiin Chief Minister Lalduhoma chuan Mizoram in Vision 2036-a kalpui mek thu a sawi a, India in kum 2036-a Olympic thleng tura hma a lakna kal mekah India aiawh thei tur Mizo thalai tam tak neih an duh tih sawiin, naupang talent nei tha zawnchhuah a, training tha pek tumin Empowering Mizoram Sports chu kalpui mek a ni tih a sawi a ni.

Chief Minister chuan silai kah chu infiamna ngaihsan hlawh tak, taksa leh rilru fim tak mamawh chi, mi bikte tan a ni tih pawh sawiin, hlawhtling taka hmarchhak bial huap inelna an thleng thei chu lawmawm a tih thu a sawi a, Shooting chu Olympic in infiamna zinga a telh avangin mi thiam, chher tlak an neih phawt chuan Empowering Mizoram Sports hnuaiah chherin sawrkarin theihtawp a chhuah dawn tih a sawi.

Forest Minister Lalthansanga pawhin intihsiakna fel fai taka buatsaih a nih theih nana mawhphurtute zawng zawng chungah lawmthu a sawi a, infiammite chu rilru fim tak nen hmalam pan thei tura rilru siam turin a chah bawk.

Tun tum hi Mizoram in North East Championship Shooting Championship a thlen tum thumna a ni a, Shooters 257 te chu State hrang hrang paruk leh Services atanga rawn telin, Aizawl khawpui chhung hmun hrang hrangah Category milin an intihsiak a, A pumpuiah Mizoram chuan Gold 25 lain Team Champion a ni a, Meghalaya in Gold 24 lain pahnihna an ni bawk.