Hulhliap SSC-a chhuak training zo te Certificate hlan

Hulhliap Short Stay Centre atanga chhuak zinga Assistant Electrician leh Aluminium Fabrication training chhuak te hnenah nimin khan Certificate hlan an ni.

Hulhliap Short Stay atanga tha taka chhuak te pualin Sawrkar chuan Special Skill Development Training a buatsaih a, Training hi Trade 3 - Assistant Electrician, Aluminium Fabrication leh Food Processing-ah te buatsaih niin September ni 6 khan Food Processing Course zir zo mi 11 hnênah Certificate hlan a ni tawh a, nimin khan Assistant Electrician zir zo leh Aluminium Fabrication zir zo te hnênah Certificate hi hlan leh a ni a, Training hi MFM Skill Centre, Dawrpui Vengthar-ah kalpui niin Aluminium Fabrication training turin mi 28 an inziaklut a, mi 17 in a tawp thleng an zir a. Assistant Electrician zir tur hian mi 34 an inziaklut a, a tawp thlenga zir hi mi 28 niin, an vaiin mi 45 iin an zirchhuak a ni. Trainee te hi Special Category huamchhunga mi an nih avang hian RPL (Recognised Prior Learning) Scheme zulzui a kalpui a ni a, Skill India Mission hnuaia PMKVY 3.0 norms anga kalpui niin Theory leh Practical Training bakah Counselling leh Soft skill te zirtirna pek an ni bawk.

Training chhuak te Certificate hlanna hunah hian MYC Chairman leh Core Committee on Hulhliap-SSC a Chairman Malsawmzuala Ralte chuan Mizo mipa te kawng hrang hrangah kan chaka kan hrisel a ngai tih sawiin, chumi in a kentel chu mahni inthunun theih a ni a, mahni hma su kaw thei kan nih a ngai, a ti a. Mahni inhmangaih dan dikin kan inhmangaih thu sawiin, mahni tana chhe tur chu ti duh lo turin Training chhuakte a fuih a ni. Hei bakah hian Training chhuakte chu Sawrkarin a theih anga puih a inhuam thu leh amaherawh chu anmahni lamin an tih tur an tih ve hmasak a ngai tih sawiin, midangte harsatna siamtu nilovin, tanpuitu ni zawk turin a chah bawk a ni.