Hnathawk lo hlawh atan nuai 80.88 pek niin sawi

Executive Engineering, Power & Electricity Department, Power Project Division, Champhai chuan hnathawk nghet ni si, chin hriat loh a awm mi parukte chu hna an thawk lo chungin an hlawh cheng nuai 80.88 pek a ni tih Comptroller & Auditor General of India report 2023 (CAG report 2023)-in a tarlang.

August 27, 2025-a Mizoram Legislative Assembly-a report pharhah heng hnathawk mi parukte hlawh atang hian Rs. 9,000 emaw 10,000 emaw thla tin an ‘cut’sak thin a, he thil thlen hun hi April, 2016 leh March, 2021 inkar bakah April, 2022 leh February, 2023 inkarah te a nih thu tarlan a ni a. April, 2016 leh March, 2021 bika pawisa an pek dan phei hi chu audit tur pawhin pek a ni lo.

Heng sawrkar hnathawk nghet paruk hlawh an ‘cut’ te hi an aiawha rawihte hnenah hian an rawih chhung atan an pe thin a, an hlawh ‘cut’ bâng zawng hi hnathawk lo sawrkar hnathawk parukte hi an pe thin a. Hnathawk lo mi parukte hlawh cheng nuai 80.88 pek hi FR 17(1) of FRSR kalh a ni CAG report chuan tarlangin, hna nghet thawk, an chin hriat lova awmte hlawh thenkhat an mi chhawrte pek hi ‘No Work, No pay’ kalh niin hei hi FR 17(1) of FRSR hnuaia tel sa a ni a. “Eng sawrkar hnathawk pawh ni se phalna nei lova chawl ringawt te chu an thawh loh chhung chu an hlawh leh hamthatna lak a thiang lo,” tih a tar lang bawk.

February, 2024-a audit an nih lai hian EE, P&E Department, Power Project Division, Champhai chuan heng sawrkar hna nghet thawkte hian hna an thawh loh chhung hian chawlh dilna an neih loh thu leh chawlh phalna pawh pek an nih loh thu a sawi a. Heng hna nghet thawkte hian an aiawha an tirhte hi thuneitute an hriattir lo tih a ni bawk a. Heng mi paruk zinga mi pathumte hi kum 2023, 2021 leh 2024 khan an pension a, pakhat hi a thi tawh a ni.