Mizoram Khawpui Fai inelna neih turah Serchhip District-ah beihpui thlak tan a ni
Serchhip DC Pisapui Hall-a ‘Mizoram Cleanliness Competition 2025’ khuhhawnna hunah hian Bawrhsap Paul L. Khuma chuan, “Pathian in min pek kan ram hi tha taka enkawl leh ven hi kan mawhphurhna a ni,” tiin Mizoram Cleanliness Competition 2025 hawnna inkhawma a tel khawtlang hruaitu leh tlawmngai pawl hruaitute chu Pathian in mawhphurhna a pek an hlenchhuak em tih inzawt turin a chah a. Kan khua leh kan veng tihfai chu sawrkar kutah chauh dah chi a ni lo tih sawiin, mi tinte mawhphurhna a nih thu a sawi a ni. Serchhip District hian Mizoram khawpui fai inelna ah hian lawmman pakhatna pawh tum hnih lai a lo dawng tawh tih Bawrhsap chuan sawiin, kum kalta ah erawh pathumna kan tlathla tih sawiin, hei hi midang in hma an sawn avang leh keimahni kan inthlahdah vang a ni thei tih a sawi a, hei vang hian nikum lam aia nasa zawka tan kan lak a tul thu a sawi a. Zirna In hrang hrangte pawhin kartin Cleanliness Drive nei se, khawtlang pawhin a tam thei ang ber faina hnatlang nei thin se a duh thu a sawi a. “Fai hi a Pathian thu a, khua leh tui tha nihna a ni a, hriselna min petu a ni tih hriain faina hi a takin i nunpui ang u,” a ti bawk.
Nimin-a he hun hman hi Serchhip-a District Urban Development Officer (DUDO) Gaston Vanlalhriatpuia chuan kaihruaiin kum 2017 atangin ‘Mizoram Khawpui Fai Inelna’ hi kalpui a nih thu leh hei hi rampum huapa khawpui fai inelna, Swachh Survekshan inbuatsaihna a ni bawk tih a sawi a. He inelna ah hian kumin November thla chawlhkar thumna hmain Faina kawnga hmalakna hrang hrangte chu thehlutin, heng te hi kumin December leh nakum January thla ah te a hmunah rawn endik tur a nih thu leh nakum January 26-ah lawmman semna neih a nih dawn thu a sawi bawk a ni.
He hunah hian UD&PA Department-a JE (SBM) Lalkhumtira chuan he inelna neih tura endikna kalpui dan tur hrang hrangte a sawifiah a, He huna tarlan a nih danin kum 2017-a Mizoram Khawpui Fai Inelna kalpui a nih hian Serchhip District chu 5-na niin kum 2018-ah 2-na, kum 2019-ah 1-na, kum 2020-ah 4-na, kum 2021-ah 5-na, kum 2022-ah 3-na, kum 2023-ah 1-na leh kum kalta 2024-ah 3-na te a ni a. SBM (U) hnuaiah kumin July thla khan Safai Apnao, Bimaari Bhagao 2025 Campaign neiin kawngsira tuiluan kawr te leh hmun tawp lai te an tifai a. Clean Hands leh Clean Homes Campaign an kalpui thu te pawh tarlan a ni bawk.