East Lungdar Block-a VC ten Training an zo

East Lungdar RD Block huamchhunga Village Council Member thlan thar te tana Training buatsaih chu nimin khan Serchhip Chanmari Veng-a District Panchayat Resource Centre-ah zawhfel a ni.
State Institute for Rural Development and Panchayati Raj (SIRD&PR), Durtlang Leitan chuan Aibawk, Tlangnuam leh East Lungdar RD Block hnuaia Village Council Member atana thlan tharte tan 'General Orientation Training for Village Councils' tih thupui hmangin he training hi tunkar hian an buatsaih a, DPRC, Serchhip-a training-ah hian East Lungdar RD Block huamchhunga VC member thlan thar mi 26 te telin Dr. Khuangthansanga Pakhuangte, Associate Professor, SIRD&PR chu Course Director a ni a, VC member thlan tharte chu VC Act 2025, MGNREGS, GPDP leh Record & Account vawn dan chungchang te SIRD&PR Faculty leh RGSA Faculty te'n an zirtir a ni.

Hemi rual hian Aibawk leh Tlangnuam RD Block hnuaia VC te pual hian SIRD&PR, Durtlang Leitan-ah training hi neih niin Aibawk RD Block atangin VC member 37 leh Tlangnuam RD Block atangin VC member 26, an vaiin VC Member 63 an tel bawk a ni.