Sawrkar laipui Ministry of Tribal Affairs hnuaia hmalakna kal mek, Adi Karmayogi Abhiyan chungchang sawihona chu nimin khan Serchhip-ah Bawrhsap Paul L. Khuma hovin neih a ni a, Serchhip District chhung khaw hrang hranga hmalak dan tur rel a ni.
Serchhip District aiawh hian District Master Trainer tur mi 5 te State Process Lab-ah telin nimin-a thutkhawm Serchhip DC Meeting Hall-a neih ah hian an Training chhunga an thil zir hrang hrangte an sawi a, hei bakah hian Adi Karmayogi Abhiyaan nihphung sawifiahin, sawrkar laipui duhdante tarlangin hmalak chhunzawm zel dan tur an sawi a ni.
Adi Karmayogi Abhiyaan-in a tum ber chu Tribal Area bikah sawrkar tha a awm theihna tur leh hmasawnna chak lehzuala a kal theihna tura ruahmanna a ni a. Thingtlang khuaa chengte ngaihtuahna a tha zawnga sawi danglama, hruaitu tha an nih theihna tura zirtir leh kaihhruai a tum a ni. Karmayogi te puihnain kum 2030-ah India ram chu ram changkang a nih theih nan Tribal Village Action Plan an duang anga. Thingtlang khuaah October 10 ralhmain Adi Sewa Kendra din vek a ni dawn a. He Adi Sewa Kendra-ah hian kar hnih (2) dan zelah mipui dawr theih turin sawrkar hnathawkte an thu dawn a ni.
He hmalakna ah hian Block Level-a training pe chhawngtu tur, Block Level Master Trainer te District Administration chuan a ruat dawn a. Nimin-a Meeting-ah hian Block Level Master Trainer te tana training - District Process Lab neih hun tur leh a hmun tur tihfel a ni a. Village Level te tana training hun tur pawh ruat fel nghal a ni bawk.
