Dan phal chinah Regularisation Scheme siamthat rel; AMCECC ten nawrhna an la titawp lo thung
Nimin khan Chief Minister Lalduhoma kaihhruaiin ZPM Coordination Committee chu thukhawmin CSS Employees chungchang an ngaihtuah a, sawrkar hmasa, MNF sawrkar in CSS Employees Regularization Scheme a duan sa chu tidanglam loa hman a ni tih sawiin, hei hi a khirh deuh avangin CSS Employees Regularization Scheme chu danin a phal chinah awlsam deuh zawka siamthat leh nise an ti a, hei vang hian CSS employee-te chu mipui harsatna siam tawh lova hna ngai chhunzawm tawh turin a ngen a ni.
Hetihlai hian CSS hnuaia thawktu intelkhawm, All Mizoram CSS Employees Coordination Committee (AMCECC) chu an thil ngiat nawr nan niminpiah atang khan tiamchin awm lova chawlh an lak avangin zirna In leh damdawi lama inenkawlna hmun te a nghawng nasa tawh hle nia thudawn a ni a, Mizoram SSA Teacher Association (MSSTA) President Rokima Varte chuan CSS hnuaia zirtirtu hlang thawhna School te chu a inkhar vek nia sawiin, sawrkarin School hawng turin ti mahse zirna an kalpui chuang lo niin a sawi a, CSS Zirtirtu tam zawk thawhna School te pawh hawng mah se zirna pangngai a kal thei lova, zirlaite chu hnathawh leh School tihfai tir an ni tih a sawi bawk.
NHM hnuaia thawktute pawhin tunhmaa Sub-Centre ti-a hriat thin Health & Wellness Centre te chu District hrang hrangah khar an nih thu an sawi bawk a, a ngheta thawkte thawhna inhawng awmchhun te pawh hna an thawk hlei thei lo nia sawiin, Community Health Centres (CHC), leh Urban Primary Health Centres (UPHC) te pawh a inkhar deuh vek a, a inhawng te pawh ZMC atanga Intern Doctor ten an inzirna atana an hawn a nih thu an sawi a, District Hospital-a Lab Technician leh X-ray Technician tiamin thawktu hrang hrangte chu CSS hnuaia thawkte an nih avangin hna an thawk mumal thei lo niin an sawi.
AMCECC chuan nawrhna an kalpui mek chu an la titawp lo tih sawiin, Vawiin chhun dar 12:00 hian Extended Committee an neih dawn thu leh an kal zel dan tur an la ngaihtuah dawn thu an sawi a ni.