Zirlaite tan Mizo Hnam Lam intihsiakna neih a ni

High School leh Higher Secondary School Zirlaite tana Mizo hnam lam intihsiakna chu nimin khan Aizawl-a Vanapa Hall-ah neih a ni a, he hun hi Art & Culture Minister C. Lalsawivunga chuan a hmanpui a ni.

Art & Culture Department leh Mizo Cultural Organisation (MCO) tangkawp buatsaih, High School leh Higher Secondary School Zirlaite tana Mizo hnam lam intihsiakna hi High School leh Higher Secondary School zirlaite zinga Mizo hnam lamte inzirtirna leh a pawimawhna te inhrilh-hriatna atana tih a ni a. Intihsiakna atan hian Mizo Hnam Lam thenkhat- Buhza Aih (Cheraw) leh Chheihlam te chu thlanchhuah a ni a. Intihsiakna ah hian Govt. Mizo High School chu pakhatna niin lawmman ah pawisafai Rs. 50,000/- an dawng a. Greenland Higher Secondary School leh St. Paul’s High School-te chu pahnihna leh pathumna niin pahnihna in Rs. 30,000/- leh pathumna in Rs. 20,000/- ve ve an dawng a ni.

He intihsiak hmawrbawkna hunah hian Art & Culture Minister C. Lalsawivunga chuan Zirlaite zinga hnam nunphung pawimawhzia inzirtirna ni fawma intihsiakna hlawhtling tak buatsaih a ni chu lawmawm a tih thu a sawi a. Zirlai kalkhawmte chu Mizo hnam nunphung (culture) vawng nung tur leh tihmasawn zel tura chahin, hnam ropui apiangin mahni hnam nunphung an ngaihdan thin thu a sawi a. Mizote chu zai leh lam ngaina tak hnam kan ni tih sawiin, chung thilte chu khawvel mithmuha pholan tlak khawpa chawisang zel turin kalkhawmte chu a fuih a. Zai leh lam baka Mizo hnam rohlu aia upate zahna chu uar thar leh zual tura chahin, Mizo nula tlangval, aia upa zah thei tak, ruihtheihthil laka fihlim nih tum theuh turin a chah bawk.

He hun hi Art & Culture Director Carol VLMS. Dawngkimi chuan kaihruaiin zirlai tha-hnem tak an tel a ni.