Dampa Bial-ah Campaign ngawrh takin kalpui tan

Dampa Bial-a MLA by-election neih turah Candidate pathum puan ni tawhin heng mite hian Campaign neiin hma an la chho tan mek.

ZPM Party chuan he Bial-a by-election neih turah hian Candidate puang hmasa berin Vanlalsailova chu an Candidate tur a nih thu an puang a, kar kalta khan ZPM Dampa Bial by-election Campaign Committee huaihawtin Bial chhunga Unit tlawh-chhuah Program hmangin Minister leh Party hruaitu thenkhat te chuan an Bial chhung an fang a, nimin khan Vanlalsailova hian Aizawl-a an Party Chhung Inkhawm neih ah thu sawiin, “Kan Bialtu MLA boralta in a lo beisei, a taka a hmuh tak loh thlentir turin ZPM Ministry-ah Dampa Bial-in Ruling MLA kan neih ngei theih nan Party sawi lova kan Bial tan kan tanrual a tul tak zet a ni,” a ti bawk.

MNF Party pawhin an Party Sr. Vice President leh Minister hlui Dr. R. Lalthangliana chu an Candidate tur a nih thu an puang tawh a, Dr. R. Lalthangliana leh Dampa Bialtu MLA boralta, Lalrintluanga Sailo chhungte chuan an Bial chhunga khaw hrang hrang tlawhin Phuldungsei, Phulpui, Pukzing, Pukzing Vengthar, Hruiduk leh Marpara te an tlawh tawh a. Dr. R. Lalthangliana chuan Dampa Bial chu Mamit District -Aspirational District an nih avangin he hmalakna hnuaiah hian hmasawnna nasa takin a thawh theih tih sawiin, “Eng pawh nise, kan phu miah loh mah nise, Pu Rintluanga Sailo vanga kan tahna mittui min hruk hul pui teh u,” tiin mipuite chu a ngen a ni.

Hetihlai hian Congress Party pawhin an Party Vice President leh Minister hlui John Ro-tluangliana chu an Candidate tur a nih thu an puang tawh bawk a. BJP pawhin an Candidate tur hi an tifel thawkhat tawh nia hriat a ni a, amaherawh chu Central lama an Party hotute pawmpuina la nghah mek a ni a, Candidate an puan hun tur erawh hriat theih ala ni lo thung.