Court Tual-ah Zotlang mipuite an pungkhawm

Thla hmasa August ni 29 zan-a Aizawl, Bawngkawn-a silai-a mi kaptu, Rochhingpuia chu nimin khan CJM Laldinpuia Tlau Court-ah a inlan a, pawikhawihtu chu a phu anga hrem tura phutin Court tual-ah Zotlang All NGO huaihawtin mipui an pungkhawm.

He hunah hian Zotlang YMA, Local Council, MUP, MHIP leh MGYA bakah Bualpui Welfare leh silaimu tuar Lalhriatrenga Siakeng lehkha zirpuite an tel a, mipuite chuan pawikhawihtu Rochhingpuia chu a na thei ang bera hrem an duh thu an aurualpui a. Zotlang Branch YMA Vice President R. Lalduhsanga chuan pawikhawihtu Rochhingpuia chu dan lova lo sumdawng thin leh rampawn atanga ruihhlo tawlhru thin, kum 2015-ah pawh Central YMA ten an lo man tawh a ni tih an hriat thu sawiin, hetianga thubuai lo nei tawh dan anga hrem ni lova, zalen taka a awm piah lamah khawlaia silai-a tualthah a tum chu an rilru a na hle tih a sawi a. Court chu a phu anga rorel tura an duh thu leh bail-a a chhuah an remti dawn lo tih a sawi bawk.

Tarlan tawh angin August 29, 2025 zan khan Rochhingpuia hian Aizawl Zotlang Veng mi Lalhriatrenga Siakeng chu Bawngkawn Veng-a an intihbuainaah silaiin a kap a. Rochhingpuia hi man nghal niin Lalhriatrenga Siakeng chu Greenwood Hospital-ah enkawl mek a la ni a, Investigation atanga an hmuhchhuah danin, a Chuap-ah tui a tlin bakah a Chuap a pan bawk a, ICU-ah la awm mekin, Ventilator nena la enkawl a ni.