BHASHANI app chungchang inzirtirna neih a ni

Bhashini Language Translator tia hriat, BHASHANI app chungchang inzirtirna, ‘BHASHINI Rajyam Workshop: Mizoram Chapter’ chu nimin khan neih niin ICT Minister Dr. Vanlalthlana chuan he hun hi a hmanpui a ni.

ATI Auditorium-a BHASHANI app chungchang inzirtirna ah hian ICT Minister Dr. Vanlalthlana chuan khawvel hmasawnna kal zelah AI thiamna chu mellung pawimawh tak niin, tangkai taka kan hman thiam pawimawh a tih thu a sawi a. BHASHINI app tangkai theih dan tur hrang hrang sawiin, mahni tawng hmangin State pawn a mi te hnenah kan ram chanchin kan sawi pawh an hrethiam vek theih tawh tur thu a sawi a. Mipui hamthatna tura Sawrkarin Digital Service hrang hrang a chhawpchhuah thin te pawh tawng hriatthiam loh avanga a chhawrtu tur ten an bawhzui ngam loh thin kha tunah chuan a awlsam phah tawh tur thu a sawi bawk.

BHASHANI app (Bhashini Language Translator tia hriat bawk) hi AI (Artificial Intelligence) behchhan Mobile Application a ni a. India ram tawng hrang hrangte mahni tawng hriatthiam a lehlin theihna app niin, hei hian tawng hrang hman avang inbiakpawhna lama harsatna awm thin a sutkian beisei a ni a. Voice-to-text, text-to-voice leh text-to-text conversion te a support a ni. Mizoram Sawrkar leh DIBD chuan June ni 18, 2025 khan thawhdunna thuthlung lo ziak tawhin, BHASHINI chu Mizoram a tangkai taka hman a nih theih nan State chhunga tawng hrang hrang te pawh AI khawl hi zirtir tura ruahman a ni.

He hunah hian ICT Secretary Amit Sharma chuan Digital khawvel ah Mizoramin hmasawnna nasa tak a hmu dawn nia a hriat thu sawiin, tawng thiam inanglo avanga inbiakpawh theihlohna (language barrier) chu hmasawnna daltu pakhat a nih theih thu a sawi a, Mizoram chhunga tawng hrang hrang huam tel thei tura BHASHANI app siam a ni ta chu lawmawm a tih thu a sawi a. Digital India BHASHINI Division CEO Amitabh Nag hnen atangin BHASHANI App siamchhuah a nih dan te, a thil tih theih leh hmabak la awmte ngaihthlak niin. AI chu tawng (language) la zirtir (train) chunzawm zel ngai a nih thu te, hmangtu an tam poh leh AI hriatna a tam belh a, a changkan zel thu te a sawi bawk a ni.

He Workshop-hian Mizo Language Hackathon atana hmalakna tur te, BHASHINI hnuaia hmanrua hrang hrang zirhona te neih niin, Mitra Programme (MITRA), Bhashini Samudaye leh Bhashadaan live demonstration te neih a ni. Workshop-ah hian Mizoram-a BHASHINI’s technology hmang tura department ten roadmap an siam dan tur sawiho a ni bawk a. Capacity-building session-ah hian State Official leh Technical Team-te chu an huapzo leh awmze nei zawka hna an thawh theih nan AI tools hmanga an thuam an tihchak theih thu tepawh  sawi a ni bawk.