CSS-a thawktu ten lungawi loh lantir an titawp lailawk
All Mizoram CSS Employees Coordination Committee (AMCECC) hruaitute chuan nimin zing khan DP&AR changtu Minister K. Sapdanga chu a chenna In-ah kawmin an thilphut leh tul an tihte thlenin, an Member tam tak chu lungawi loh thu leh an inbengdaih hram hram thu te an hrilh a. DP&AR Minister chuan a theih chin chinah AMCECC hruaitute thu thlen chu lo bawhzui sak a tiam nia thudawn niin, CSS-te dahngheh an nih theihna tura checklist chu siamthat a ni dawn a, tun aia khirh lo deuha siam tum a ni a. Thla khat velah chuan peih hman beisei a ni.
Hetianga DP&AR Minister hova an in-kawm hnu nimin chhun khan AMCECC hian Extended Meeting neiin sawrkar hmalakna ngaichang chung zelin lungawi lohna chawlh lailawk an rel tih thuchhuah siamin an tarlang a. Nimin zing khan DP&AR Minister K. Sapdanga a chenna In-ah AMCECC hruaitute'n an kawm thu tarlan niin, “Minister zahawm tak hian Government of Mizoram Regularisation of CSS Employee Scheme, 2024 chungchang leh OM Check List te thla khat chhunga min siamthat sak a tiam a, kan duh dante sawiho zel a remti,” an ti a.
DP&AR Minister ngenna zahawm an tih thu leh sawrkar hmalakna hi ngaihchan nise an tih thu tarlangin, “'Chutihrualin, Sawrkarin Show Cause Notice a chhuah tawh hi cancel nghal vek tur leh CSS employee-te laka hremna lek a tum mek hi sut nghal turin kan phut nghal. Sawrkara lungawilohna kan lantir mek hi sawrkar hmalakna ngaichang zel chungin leh CSS Employees thlawptu mipui te tawrhna a nasat tawk em avangin chawlh lai lawk phawt nise kan ti,” tiin nimin tlai dar 4:00 khan nawrh an tihtawp tak thu an sawi a ni.