CAG Report-a hna thawh zawh hman loh tarlan Buhchangphai tuilakna MJA Member ten an tlawh

Mizoram Legislative Assembly thutkhawm zawhfel taka Chief Minister in Comptroller and Auditor General of India report a pharh taka March 31, 2023-ah hna thawh zawh loh a tarlan zinga mi, PHE Department hnuaia Buhchangphai tuilakna chu nimin khan MJA Kolasib District te chuan a hmunah an tlawh.

Buhchangphai Solar Pumping Water Supply Scheme tih puitlinna tur hian Project pathum zingah cheng nuai 14.25 senna 'Construction of Battle Wall Sedimentation Tank of Water Plant' chu thla hnih (2) chhunga zawh hman tur a ni a, he hna hi May 16, 2022-ah thawh tan niin zawh hun tur chu July 15, 2022 a ni. Hei bakah hian cheng nuai 6.77 senga siam 'Construction of Zo Rawra Filter of Water Plant' chu thla khat chhunga zawhfel tur niin June 17, 2022 atanga July 15, 2022 inkar chhunga zawhfel tur a ni a. Project dang pakhat 'Construction of Clear Water Sump of 1,00,000 Litres Capacity' chu thla hnih chhung bawka zawh fel tur niin September 12, 2022-ah thawh tan a ni a, November 9, 2022-ah zawhfel tur niin cheng nuai 7.85 senna tur a ni a. CAG leh Department Official-te chuan heng Project te hi January 21, 2023 khan Joint Verification neiin an tlawh a, zawh hun bituk siam vek ni mahse tlawh a nih lai thleng pawh hian hna hi zawh ala ni lo vek tih CAG Report-ah a lang a ni.

Nimin-a MJA te lo dawngsawngtu Buhchangphai Village WATSAN Committee Chairman Sangbera, VCP chuan Project an bunna hmun ram chu Buhchangphai-a C. Rongenga’n a thlawna a pek niin Dil hmun a ni a, hei hian a tirah hna tan nghal turin harsatna a siam tih a sawi a. Hna hi tan tlai in a hunah zo hman chiah lo mah se August 17, 2023 atang khan an chhawr tan a, tunah chuan an khua in an tangkaipui hle tih a sawi a. Tui pump-na tura dah Solar Plate chuan Electric power 37.5kW a siamchhuak thei a, Tui pump-na atan an khawl hman hi 30hP niin khawl chu a chawm zo tha hle niin a sawi a. Heta tanga tui an pump chhuah hi Main Reservoir Tanky, litre nuai khat dawngah an pump a, hei bakah Tanky dang pahnih - Gosen Veng leh Saron Veng ah te khawl hmang bawk hian pump in heta tang hian mipuite hnenah tui hi semchhuah leh thin a ni tih a sawi bawk.

MJA hruaituten PHE, Kolasib WATSAN Division EE, Lalrosangi an biaknaah Buhchangphai khua a chhungkaw chhungkaw 223 chuan tui connection an nei tawh a, Department lam record dan chuan tui connection nei lo an awm tawh lo tih a sawi a. Buhchangphai Solar Pumping WSS hi nikum June 20, 2024 khan WATSAN Committee enkawl turin hlan a ni tawh a ni.