YMA in Jail-a hnathawh enfiah

Sub-Hqrs. YMA Serchhip-a Vigilance & Monitoring Committee chuan nimin khan Serchhip District Jail cheithat hna thawh mek chu a hmunah tlawhin hnathawh dan an enfiah.
Mizoram sawrkar in ruahmanna a siam angin SASCI Part-V sum cheng vbc. 3.35 sengin Serchhip District Jail cheithat hna, Improvement and Upgradation of District Prison under SASCI 2023-2024 hi thawh mek a ni a, he hna hi kumin May 20 khan thawh tan niin thla 12 chhunga zofel tura ruahman a nih thu helai hmuna hnathawktute chuan an sawi a. He hna hi Huapzo Construction ten thawkin he ruahmanna hnuaiah hian Administrative Building awmsa siamthat leh tihzauh hna te, Meeting Room leh Barrack sak that hna te, Segragation Cell & Vocational Training Hall sak hna te, Guard Duty Post pakhat sak thar tur te, Medical Inspection Room chhawng khat-a sak belh tur leh District Jail Superintendent Quarters (Type-IV) pakhat sak turte a tel a ni.

Nimin-a Sub-Hqrs. YMA ten helai hmuna hnathawh an enfiah ah hian hna bul tan chauh ala ni a, tunah hian Meeting Room leh Barrack sak turah hian a ban thenkhat phun ni tawhin Jail chhunga Segragation Cell & Vocational Training Hall sak tur hi a ban phun kim a ni tawh a. Helai hmuna hnathawktute chuan PWD lamin an hnathawh hi uluk taka an vil thu leh an duh dan ang ngeia sak hna hi an thawh mek thu an sawi a. PWD aiawh lo awm te pawhin tun dinhmunah chuan harsatna em em a awm loh thu an sawi bawk a ni.

Helai hmuna thawktute chuan tunhnaiah hnathawktu chungchangah harsatna an neih thu lo sawiin, an hnathawktu tam zawk te ILP fel loh avanga man an nih thu an lo sawi bawk a, tunah hian ILP hi an buaipui leh mek thu leh an tihfel chuan tluang taka hna pawh thawh chhunzawm theih an beisei thu an sawi a. Sub-Hqrs. YMA Vigilance & Monitoring Committee te pawhin tha taka hna thawh an duh thu sawiin, hnathawh chhe tawh insiam-that tir leh ngai lo tura a tir atanga tha taka hna thawk turin thawktute an ngen bawk a ni.