YMA leh PWD te thawhhona thuthlung zirho

Mizorama kawngpui tha kan neih theihna tura Mizoram PWD leh YMA ten thawhhona thuthlung an ziah chungchang zirhona chu niminpiah khan neih a ni.

Central YMA Hall-a he hun hmanah hian PWD Engineer-in-Chief H. Zoramliana chuan Mizoram chhunga inkalpawhna kawngpui tha a awm theihna tura PWD leh YMA thawhhona a tha a, PWD in kawngpui enkawl an ngah thu leh sum indaihlohna avanga duhthusama enkawl theih a nih loh thu te, YMA te tawiawmna leh thawhpuina an mamawh thu a sawi a. MoU ziah avanga hmun tam takah hmasawnna leh kawngpui siam kawnga awlsamna an hmuh thu a sawi bawk.

Central YMA President Lalhmachhuana pawhin YMA ten kawngpui siam te pawngpaw sawisel mai lova MoU ziah anih avanga tawiawm tur leh thawhpui tur an nih dan te, sawisel tul a nih chuan huai taka sawisel a tul thu leh enpui zel turin YMA hruaitu kalkhawm te a chah a. PWD nena thawhhonaah theihtawp chhuah a kawngpui tha kan neih theihna tura hma la turin a chah bawk. 

He hunah hian Sub- Hqrs YMA, Group YMA leh Branch YMA aiawh te an kalkhawm a. Zawhna leh chhanna hun hman a ni a, Zoram hmun hrang hranga kawngpui siam chungchanga harsatna leh kawngpui chhia chungchangte sawiho leh inhrilhfiahna hun hman a ni bawk. 

YMA leh Mizoram PWD te hian kum 2018 atang khan thawh-hona thuthlung an lo ziak tawh a, kum 2022-ah ziah thar leh a nih hnuah August ni 8, 2025 khan kum 3 chhung atan MoU hi ziah thar leh a ni a. He thawhhona thuthlung hi hlawm 5-ah then niin Awareness Campaign chungchang ah hnathawh tur lian zual deuhah bul tan a nih hma in a bialtu PWD hotute ruahmanna in hnathawhna tur huamchhunga YMA Branch/Group/Sub- Hqrs. hruaitute nen Project nihphung, hnathawh dan tur leh tul dangte inhrilhfianna neih thin nise tih a ni a. Informatory Board chungchang ah Project intanna leh tawpna, a paltlang kawng/khua ah te detailed information PWD in a duan angin Informatory Board, PWD senso in tar thin tur a ni a, a venhim hi YMA mawh a ni ang an ti.

Inspection & Monitoring chungchang ah Hnathawh laiin hun remchang ah PWD leh YMA hruaitu ten Joint Inspection an nei ho anga, a tul dan a zirin Bialtu MLA/Sawrkar hotu dang leh NGO dangte pawh sawm theih a ni anga, Inspection Programme hi PWD leh YMA te inberawn a siam thin tur niin Inspection Report chu PWD leh YMA-ah thehluh thin tur a ni. Tihtur dang ruahman ah hna thalo a awm chuan, YMA-in a mala hma la mai lovin, bialtu EE/SDO te nen sawiho a nih hnuah Department-in Contractor-te hi instruction pek thin tur a ni anga. Kawng thatna tura YMA-in rawtna ziaka a siamte Department-in mumal taka lo dawngin, Department hmalaknate Branch YMA-ah ziaka hrilh thin a ni ang.