Bairabi atanga Sairang thleng tur Rel Service tunkar Inrinni khian PM in a hawng dawn

Bairabi atanga Sairang thlenga Rel service tur chu September ni 13,2025 khian India Prime Minister Narendra Modi chuan a hawng dawn a, hemi atan hian ruahmanna engkim peih a ni tawh.

Ruahman dan chuan Prime Minister hian September ni 13,2025 (Inrinni) hian langin Aizawl a rawn tlawh ang a, Lammual-a vantlang inkhawm atangin a hawng dawn a. Union Minister of Railways leh Information & Broadcasting changtu ni bawk Ashwini Vaishnaw chu a hma ni September ni 12, 2025-ah a lo thleng ang. Kilomenter 51.38 a thui Bairabi to Sairang kawng siam nan hian a tirah cheng vbc. 2393.49 ruahman a niin a hnuaah vbc. 5021.45 ah revise a ni a, a zawhna atan hian vbc. 8215 vel ngai tura chhut a ni. 

Bairabi to Sairang inkar rel kawngah hian lei dawh lian (Major bridge) 55 leh Lei dawh tenau (minor bridge) 87 a awm a, Hmun 32 laiah leiverh (tunnel) a awm a, leiverh zawng zawng thui/sei belhkhawm hi km 12.63 a ni a. Leiverh tunnel thui ber sei/thui zawng chu km 1.88 a thui a ni. He project atan hian Railways in ram hectare 481.18 a zau an hmang mek a. Kolasib District huamchhung ah Forest ram hectare 38.94 a zau leh Non-Forest Land mimal ram hectare 308.01 a zau bakah Aizawl District huamchhung ah Forest ram hectare 35.547 a zau leh Non-Forest Land mimal ram hectare 98.595 zau an hmang a. Heng zawng zawng ah hian zangnadawmna compensation vbc. 840 chuang ram neitute pek an nih tawh nia thudawn a ni.

Bairabi-Sairang hi Rel kawng lian, Broad Gauge Railway Line tur a ni dawn a. RITES-ten he Rel kawng sial survey hna hi kum 2005 bawr khan an zofel a. Rel kawng siam hna hi sawrkar laipuiin kum 2008-2009 khan sanction-in hna hi kum 2015-ah khan tan a ni. Bairabi atanga intanin Sairang huam telin Rel Station pali a awm dawn a. Chungte chu Bairabi atanga a hlat zawng tehin KM 16.38-ah Hortoki Rel Station; KM 26.10-ah Kawnpui Rel Station; KM 37.12-ah Mualkhang Rel Station leh a tawpna KM 51.38-ah Sairang Rel Station (Sihhmui) te an ni a. Bairabi–Sairang New Railway Line Project hi November 29, 2014 khan Prime Minister Narendra Modi chuan lungphum a lo phum tawh a ni.

Sairang atang hian Mizoram chhim tawp Hmawngbuchhuah thleng Rel hi service tir zel tum a ni a, Rel kawng survey hna thawh nan hian Ministry of Railways chuan Rs. 33,15,60,293 a sanction a, he sum hmang hian Rel kalna tur tak leh Station awmna hmun tur survey a ni dawn a ni. Sairang atanga Hmawngbuchhuah inkar Rel kawng hi km 223 ni tura ruahman a ni a, a senso atan hian vaibelchhe 15006.96 ruahman a ni a. Lei 110 awm tura ruahman a niin Leiverh 64 leh Station 16 awm tura ruahman a ni.