Zirlai zinga Civil Service lama tui te kawmna nei

Serchhip Bawrhsap Pisa buatsaihin nimin khan Serchhip-a zirna In hrang hranga Civil Service lama kal tum leh chakna nei te chu Bawrhsap Paul L. Khuma hova kawm niin an kal zelna tura pawimawh te sawipui an ni.
Serchhip DC Meeting Hall-a he hun hman ah hian Bawrhsap Paul L. Khuma chuan zirlaite leh naupang ten an hma hunah Civil Service lama tuina an neih theihna tura sawrkar Pisa kalphung leh sawrkar inrel-bawlna te an hriata Civil Service-a luh an tumna kawnga châkna leh tumna tak tak an neih theihna atan he hun hi buatsaih a nih thu a sawi a. Serchhip chu India rama ziak leh chhiar thiam tamna ber District a nih avangin zirlaite laka an beiseina pawh a sâng hle tih sawiin, phûrna (inspiration) neihna tur hian lian lua leh te lua a awm lo a, kan tumna lama min pawt kal theitu a nih chuan eng pawh a tha vek a ni, a ti.

He hunah hian Serchhip DC Office-a SDC Dr. C.Vanlalchhanhimi chuan powerpoint presentation hmangin Civil Service-a luh dan kalkawng leh an hnathawh tlangpui a sawifiah a, zirlaite chuan Civil Service-a luh an tum leh an duh chhante an sawi bakah an thil hriat duh hrang hrangte an zawt bawk a. Serchhip DC Office-a inrelbawlna te hrilhfiah an nih bakah DC chenna In te pawh an tlawhpui bawk a ni.

Nimin-a he hun hman ah hian Brilliant HSS Serchhip atangin zirlai 10 an tel a, Marian H/S Serchhip leh Presbyterian English School, Serchhip atangin zirlai 5 ve ve an tel a.  Serchhip-a MCS Officer te, DIPRO leh chanchinbumite an tel bawk a ni.