Zangnadawmna la hmuh loh vangin pungkhawm

National Highway-154 siam mek a zangnadawmna (Compensation) la hmu ve lo mi 34 te intelkhawm, Land Owners Association, Bairabi chuan nimin khan zangnadawmna an hmuh theih loh avangin Kawng dan an tum a, thuneitute nen an inbiak hnuah August ni 15, 2025 thleng nghak leh tura PWD hotuten an ngenna chu pawmin, sawrkar hmalakna ngaihchan leh phawt nise an ti.

Hailakandi District, Assam atanga lo kal NH-154 hian Bairabi-Meidum-Pangbalkawn-Saihapui ‘K’-Bukvannei- Buhchangphai khua te paltlangin Bilkhawthlir-ah a lut chho a. He Kawngpui an siam tan tirh atanga tun thlengin Bairabi khua a cheng chhungkaw 34 te chuan kawngpui in an ram a tihchhiat zangnadawmna hi an la hmuh loh avangin hun rei tak atang tawhin sawrkar thuneitu hrang hrangte nen an indawr tawh thin a, tun thlenga a hlawhtlinna an la hmuh loh avangin nimin khan lungawilohna lantir an tum a. Lungawilohna lantir an tumna hmunah hian sawrkar hotute nen inkawmin sawrkar thuneitute ngenna chu an ngaichang leh rih dawn a, August ni 15 thlenga hlawhtlinna an hmu lo anih chuan a tul anga hmalak leh nise an ti a ni. 

Kawngpui laih tan hun kum 2006 khan Compensation pek vek tawh angin Ministry of Road Transports and Highway (MoRTH) chuan an hria a, mahse pek hmaih chhungkaw 34 la awm te chuan tun thleng hian Compensation hi an la dawng ve lo a ni.

Land Owners Association, Bairabi hruaitu leh member te hi nimin khan Bairabi khaw dai-a Chawlhbuk-ah pungkhawmin an hmalakna te an sawi a, hma an lo lak tawhna ten awmzia a neih theih loh avangin lungawilohna lantir nan kawngpui dan (block) a Contractor te hnathawk thei lo a siam mai chu an tih theih tawk nia an ngaih thu an sawi a ni.

He hunah hian PWD National Highway Division-III, Kolasib-a EE, Er Lalduhthlanga chuan kawng laih tan, kum 2006 khan MoRTH chuan Compenation pek vek tawh anga an hriat avangin tuna la hmu lo mi 34 te chungchangah hian zawhna a tam thu leh zawhna awm te an chhan ve reng thu a sawi a. Tunah hian Revenue Department in an pawmpui Award List chu Guwahati-a Regional Office-ah thehluh a ni tawh a, anni hian Delhi-a Main Office-ah thawn lehin an rawn pawm chuan Kolasib DC Office-ah Compensation hi pek theih turin an rawn thawn a rin thu a sawi a, theihtawp chhuah in an bawhzui reng thu a sawi bawk.

He Inkawmhona ah hian thla thar August ni 15 thleng PWD hotute hmalakna ngaichang leh tura PWD lamin an ngenna chu ram neitute hian an pawm a, August ni 15 thleng pawh a chanchin lawmawm a awm loh chuan an kal zel dan tur hi Land Owners Association, Bairabi chuan an rel leh dawn tih an sawi a ni.