Akashvani Aizawl kum 60-na lawmna hun hmang

Akashvani Aizawl din kum 60-na pualin nimin khan a thawktuten Tuikhuahtlang-a Akashvani Aizawl pisa-ah lawmna hun an hmang.

Nimin-a hun hman hi Akashvani leh Doordarshan Addl. Director General (NE Zone) Ashish Bhatnagar chuan khuallian nia hmanpuiin Akashvani Aizawl in a din kum 60-na a thleng chu a lawmpui thu a sawi a, Radio chu mipuite beng ti tlai bertu pakhat leh a hunlaia thil thleng chanchin reng reng a nemnghehna, tehna dik lo thei lova ngaih a nih thu a sawi. Ashish Bhatnagar chuan All India Radio Station atanga rimawi leh hun buatsaih hrang hrang tihchhuah thin chuan hlut a hlawh hle thin tih pawh sawiin, All India Radio Aizawl chu hmar-chhak State-a Station dang zingah pawh hmasawn ber pawl a nih thu a sawi a, hmanraw tunlai ber ber hmanga hnathawh thin a nih thu a sawi bakah mipuite chhawr tangkai theih tura Radio hmanga programme chhawpchhuahte chu Mizoram khawpui Aizawl hriat rualin hmun kilkhawr atang pawha an lo hriat theih phah thin thu leh sawrkar laipui atanga hmalakna pawh radio kaltlangin kut-hnathawktu tam takin an chhawrin an hmang tangkai thin tih a sawi bawk. 

Akashvani Aizawl Director leh Mizoram Cluster Head DR. Lalropuia pawhin All India Radio Aizawl chu rambuai kum, kum 1966-a din a nih thu leh khatih hunlai a curfew kar-a Zoram mipuiten a thlawna sawrkar thuchhuak leh chanchin thar an hriatna atana thil tangkai tak leh mipui khawhar in awmtleina a nih thin thu a sawi a, Radio chuan hmasawn zelin tunlai thiamna kawnga hmasawnna tam tak karah pawh chanchinthar leh Radio programme hrang hrang chu ngaihhlut a hlawh reng thin tih a sawi bawk.

Tun dinhmunah Akashvani Aizawl-ah hian thawktu mi 170 an awm mek a, a ngheta thawk mi 50 leh a nghetlo a thawk mi 120 an ni.