World Indigenous Day pualin ZORO in Chibai buk

Inrinni kalta, August 9, 2025 kha ‘International Day of the World's Indigenous Peoples’ niin he ni pual hian ZORO chuan Zohnahthlakte chibai an buk a ni.

World Indigenous Day pual hian Zo Re-unification Organisation (ZORO) Vice President L. Ramdinliana Renthlei chuan Zohnah-thlak zawng zawngte chibai bukin, Zofate hnam anga inpumkhatna leh dinchhuahna a nih theih nan Zofa unau zawng zawngte duhsakna a hlan a. Khawvel ah ram leilung fate hnam lian leh chak zawkte'n an hneh lak avanga an awp beh tak hnam chi peng 5,000 lai mai an thu leh ram 90-ah inzar pharhin mihring maktaduai 370 zet an tlin thu a sawi a, “Mizote pawh chu'ng zinga hnam pakhat chu an ni,” a ti.

Khawvel sawrkar intelkhawm pawl, UN chuan he'ng ram leilung fate hi awpbettute laka an talchhuah theihna tur leh an pianpui dikna leh chanvote an neih let theih nan kum 2007 September ni 13 khan, ‘UN Declaration on the Rights of Indigenous Peoples’ puangin, a theih chen chenah mahnia ro inrel tura thuneihna pek a rawt a, he declaration hnuaiah hian Zofate pawhin tharum hmang lova mahnia ro inrel a, hnam a nih hun tur nghakhlel takin an thlir mek tih a sawi a ni. ZORO Vice President chuan Zofate chu ram hrang hrangah thendarh an la nih rih avangin hnam anga an inpumkhat a, inpeizawn a, intuamhlawm tawn chu tun dinhmuna an thlen chin a ni rih tih pawh sawiin, hemi kawngah hian an titha thaw-khat viau nain, hmasawnna tur an la ngah hle tih a sawi bawk a ni.

Zofate insuih khawmna tura hma latu pawl, Zo Re-unification Organisation (ZORO) hi kum 1988 May 20 khan din a ni a, May ni 21, 2004-ah Zofa zawng zawng aiawhin UNO-ah Affiliated NGO member-ah khung a ni a. Zohnahthlak Hnam hrang hrang inkarah te pawh hma an la thin a ni.