Raltlan 1,947 te Biometric Enrolment tih sak tawh

Mizoram-a raltlan awm mek te kutzia leh mit-naute lakkhawm hna Mizoram District 11-a kalpui mekah Zirtawpni tlai thleng khan Myanmar raltlan 1,947 te Biometric Enrolment tih sak an ni tawh.

Home Department hotute sawi danin Mizoram-a Myanmar raltlan 32,000 chuang leh Bangladesh raltlan mi 3,000 tling lo deuhte mit-naute leh kutze lakkhawm hna hi July ni 28, 2025-a bul tan an awm laiin a nawlpui chuan July ni 30 leh 31-ah an tan a, July thla tawp lamah bul an tan hman vek a. Hetihlai hian District hrang hranga he hna thawktute hian harsatna an tawk a. A bikin Biometric Enrolment hnathawhna Electronic khawl hman hleih theih loh a awm nual bakah Internet Signal that tawk lohna hmunah harsatna an tawk bawk a ni. Relief Camp-a a huhova awmte mit-naute leh kutze thla lak a awlsam viau laiin an fate Aizawl leh District danga lehkhazir mekte an awm avangin lak kim vek hleih theih loh a awm a. An chhungte leh thiante belte leh mi In luahte chu an awmna hmun a inkarkik avangin hna a kal chak thei lo bawk a ni.

Myanmar raltlan awm tam berna Champhai District-ah mi 13,500 chuang an awma ngaih a ni a, hetihlai hian Champhai District official-te Electronic khawl hman chu a fuh theih loh avangin Inrinni khan Aizawl atangin khawl thar an la leh a. Tunkar chho hi chuan an thawk tluang thei tura an inngaih thu an sawi a. July ni 31 atang khan an hna tan tawh mah se, mi 7 chauh Biometric Enrolment an la ti thei a ni.

Myanmar raltlante hi Mizoram District 11-a an awm laiin Bangladesh Chittagong Hill Tract atanga raltlante chu District pathum ah chauh an awm a. Lawngtlai District-ah mi 2,000 chuang an awm a, Serchhip District-a Thenzawl-ah mi 266 awmin Lunglei District-a Khawmawi khua ah 63 an awm bawk a ni.