Tuna kalphung angin kumthar lamah Sawhthing lei kalpui leh theih beisei a ni
Agriculture Minister PC. Vanlalruata'n Sawhthing hralhna man la dawng lo loneituten an sum dawn tur chu a bikimin an hmu vek dawn tih sawiin, kumthar lamah pawh tuna an kalphung pangngai angin Sawhthing lei hi kalpui theih an inbeisei thu a sawi bawk.
Agriculture Minister PC. Vanlalruata hian Zirtawpni khan a Pisa-ah thuthar thehdarhtu thenkhat te kawmin sawrkar in Sawhthing a lei chungchang hi a sawi a, Agriculture Minister chuan sawrkar in Sawhthing leina man a pek tlai chhan chu sawrkar laipui atanga Market Intervention Scheme (MIS) an dil vang a nih thu sawiin, Central sawrkar in a neih Market Intervention Scheme (MIS) hi an dil ve thu leh cheng vaibelchhe engemaw an hmuhlet dawn thu sawiin, chu chu an thlahlel ve deuh bawk tih a sawi a, “Hetiang (MIS) hmu tur chuan Direct Benefit Transfer-a kan farmer te account-ah a luh a ngaih avangin loh theih lohna avangin tun tumah hian payment a ti muangchang deuh hlek a ni,” a ti a. He harsatna hi kuthnathawktute pawhin lo hrethiam se a duh thu leh sawrkar pawhin theihtawp chhuahin a inbuatsaih thu a sawi a. Tunah hian Mizoram hmun hrang hranga Secondary Collection Centre (SCC)-te chu kalchilhin Sawhthing an lei leh hralh dante an endik thu leh a felfai chin apiang chu a tahtawla pekchhuah an tum thu sawiin, August thla chhunga an in pechhuak zo hman lo deuh a nih pawhin September chu kai thui lo turah an in ngaih thu a sawi a ni.
Mizoram Agriculture Marketing Board (MAMB) Chairman ni bawk PC. Vanlalruata chuan sawrkarin loneitute hnen atanga Sawhthing a lei zawng zawng chu quintal 3,47,387 a tlin thu a sawi a, heta tanga sawrkar in sum (Support price) an pekchhuah tur zawng zawng chu cheng vbc. 140 chuang hret a nih thu leh chuta tanga sum an la pekchhuah loh chu cheng vbc. 71 chuang a nih thu a sawi a, cheng vbc. 70 dawn chu Sawhthing chingtute kutah sum pekchhuah a ni tawh tih sawiin, kuthnathawktute hian an sum hmuh tur dik tak chu an hmu kim vek dawn tih a sawi bawk a ni.
Agriculture Minister PC. Vanlalruata hian kuthnathawktute tharchhuah Sawhthing lei chungchangah hian tuna an thlen chin ah hlawh-chham an in tih loh thu pawh thuthar thehdarhtute hnenah hian sawiin, a rate chhiat ber kumah pawh farmer ten kg. ah Rs. 50/- zel an dawng thei chu an lawmpui thu a sawi a. Kumthar ah pawh an kalphung pangngaia kal chhoh theih an inbeisei thu sawiin, Chief Minister in a ngaih pawimawh em em thu leh Farmer ten System felfai zawkin Sawhthing an hralh theih tawh a beisei thu a sawi bawk a ni.