UPSC Civil Service Exam-a Mizote tlin theih nan ‘UPSC Grooming Scheme’ tlangzarh a ni
UPSC Civil Service Exam-a Mizote tling kan awm chhoh zel nan tun atanga hemi kawnga naupangte chher hriamna atan sawrkarin a duan, ‘UPSC Grooming Scheme’ chu nimin khan School Education Minister Dr. Vanlalthlana’n a tlangzarh a, he Scheme hi HSLC Exam pass zo hlim naupang titha zualte tana buatsaih a ni.
Nimin-a tlangzarh tak ‘UPSC Grooming Scheme’ hi a hming tak chu ‘A Scheme for Cultivating Early Foundations: Preparing Students for the UPSC Examinations from a Young Age’ tih a ni a, UPSC Civil Service Exam-a Mizote tling kan awm chhoh zel nan tun atanga hemi kawnga naupangte chher hriamna atan sawrkarin a duan niin MBSE chu a Scheme duang tur leh hemi kawnga hma la chhunzawm tura tih a ni a. He Scheme hi HSLC Exam pass zo hlim naupang titha zualte tana buatsaih niin, Civil Service Exam tum, naupang thlanchhuah te chu an kal zel dan tur sawrkarin a ngaihtuahsak ang. UPSC Grooming hi kumtin buatsaih theih beisei a ni a, a Scheme hnuaiah hian naupangte chu UPSC Prelims Paper II behchhana Exam tira a titha zual te thlanchhuah an ni ang a, interview an paltlang hnuah Coaching Centre thlan bikah naupangte hi Admission tihsak an ni anga. Coaching Centre-te nen hian MoU ziakin, zirtirna mai bakah kaihhruaina tha leh rintlak pe tura beisei an ni.
Hei bakah hian Mentoring programme duan a ni bawk a, hetah hian IAS ni lai mekte, Retired tawh te leh sawrkar hnathawk dangte nen inkawmna hunte leh inkaihhruaina hunte neih thin a ni anga. Heng bakah hian sawrkar hnathawh dan leh kalphung te a tak ngeia zirchiana enpui thin an ni dawn bawk a. He Scheme hian zir thiamna ringawt ni lovin naupangte chu Leadership, Ethical Grounding leh Public Service lam tuipui turin a buatsaih ang a, sawrkar chuan state tan mai ni lo, India ram tana Officer tha leh rintlak chherchhuah a beisei a ni.
Nimin-a ‘UPSC Grooming Scheme’ tlangzarhna hun Aizawl-a MBSE Conference Hall-a neih ah hian Education Minister Dr. Vanlalthlana chuan zirlai naupang nih lai atanga Civil Services atana inpuahchahna kalpui chu sawrkarna fawng an chelh hma atanga an vei tawh leh tihhlawhtlin an intiam tawhna a nih thu sawiin, a hlawhtlinna kan hmu ta chu lawmawm a tih thu a sawi a. School Education hnuaia peng hrang hrang MBSE, SCERT, Samagra etc. leh Mizoram Youth Commission bakah Finance Department te nena an thawhhona that zarah an hlawhtling tih a sawi a. UPSC Civil Services Examination-ah hlawhtlinna thangkhatlian dawn kan chang tawh lo chu mi zawng zawngin kan vei nia a hriat thu sawiin, Zirlai naupang an nih atanga bul tanpui a tula an hriat vangin hma an la rawih dawn tih a sawi a, tun hi pilot project a nih avangin Aizawl ami ngei an tih thu leh kumtina hei hi kalpui an tum avangin huang pawh an zauh chhoh zel an inbeisei thu a sawi bawk.
He hunah hian Mizoram Youth Commission Chairman Malsawmzuala Ralte leh Adviser to CM (Handholding) Dr. KC Malsawmzauva te pawhin thu an sawi bawk.