ASUTP sawihona neih a ni

Nimin khan Chief Minister Lalduhoma hovin a Office-ah Aizawl Sustainable Urban Transport Project (ASUTP), Project Readines chungchang sawiho a ni a, UD&PA Minister K. Sapdanga chuan Aizawl khawpui zau chho zel mila khawpui chhung inkalpawhna tur ruahmanna an siam tarlangin, a senso hi Asian Development Bank loan tinzawn a nih thu a sawi bawk. UD&PA Secretary Lalmalsawma Pachuau chuan ruahmanna an siam tlangpuite tarlangin, Lengpui Airport huamin Aizawl tlak lam pangah mihring chenna a zau thla zel tura ngaiin, Muallungthu atanga Sihphir huama khawpui inkalpawhna (Urban Mobility) an ruahman te, Kulikawn leh Bawngkawn inkar corridor leh Junction tihhmasawnna te, Temple atanga Vaivakawn kawngpui leh a chhehvel tihhmasawn leh junction siam that te, Aizawl tawntirh hmun pathuma Truck, Bus leh Maxi Cab Terminal lian siam leh kawngpui thlan bik pahniha EV Bus tlantir a, chung Bus te chawmtu tur EV feeder Bus khawpui chhung kawng thlan bika tlantir te a tel a ni.