Tourism Department leh IRCTC in thawhhona ziak

Mizoram sawrkar-a Tourism Department leh Ministry of Railways hnuaia PSU, Indian Railway Catering & Tourism Corporation (IRCTC) te chuan Mizoram-a Tourism hmasawnna atan thawhhona thuthlung niminpiah khan an ziak.

He thawhhona thuthlung hi Tourism Department-a Joint Director Lalthakimi Pachuau leh RN Ranmung, Chief Regional Manager, IRCTC, Guwahati ten kum hnih (2) atan an nemnghet a. He thawhhona thuthlung hian nasa leh zuala Mizoram in Tourism lama hmasawn theihna tura hmalakte, khualzin te awlsam zawka an inkal pawh theihnan te, awmze nei zawk a khualzin te hmunhma an tlawh tur an tlawh theihnan te leh an hmun tlawh turte an duhdan mila duansak bakah khualzin tam zawkin kan ram an tlawh theihnan a hmalak te leh thildang tam tak a tel a. Mizoram Tourism mai bakah a ram mipuite tan mellung pawimawh tak tur niin, khawvel hmun zau zawka Mizoram phochhuahna leh khualzin tam zawk kan neih theihnan a min thlunzawm tura hna thawktu tur pawimawh tak an ni dawn a ni.

Hei bakah hian September, 2025-a Aizawl-a Rel lu lo lut mai tur atana thawhhona tangkai tak a ni dawn a. IRCTC hian Mizoram mipuite khawvel hmun zau zawk nena min thlunzawm turin October thla chhung hian Special Tourist Train rawn luh tir an tum thu an sawi a ni. Heng bakah hian kan ram hmunhma mawi leh tlawh tur kan neihte Tour Package a siamin zau zawka khualzin kan hip theihna tur kawngah nasa takin hma an la dawn a. Man man zawka tlawh theihna tur Outbound Tour Package te an chhawpchhuak dawn bawk a ni.