Mizoram Kailawn 4th Edition

Mizo thalaiten ngaihtuahna thar hmanga anmahni tana intodelhna leh midangte tan pawh a eizawnna tha an siam theih nana inelna ‘Mizoram Kailawn 4th Edition’ chu nimin khan Adviser to Chief Minister Dr. KC. Lalmalsawmzauva chuan a tlangzarh.

Mizoram Startup Mission bultuma Mizo thalaite cho chhuahna tura ‘Mizoram Kailawn 4th Edition’ buatsaih a ni leh tur chu lawmawm a tih thu Dr. KC. Lalmalsawmzauva chuan sawiin, Mizo thalaite zingah thiamna chhawr-tlak nei leh ruahmanna thar ngaihtuah chhuak thiam te kaihchhuahna turin Planning & Programme Implementaton Department chuan tum thum lai ‘Mizoram Kailawn’ chu a lo buatsaih tawh thu leh thalai mi engemaw zatin an lo tangkaipui tawh thu a sawi a. Intodelhna kawngah leh midang tana eizawnna siam theitu ni tel bawk hmasawnna thlen thei ruahmanna thar ngaihtuah chhuaktu ni turin Mizo thlalaite, ‘Mizoram Kailawn 4th Edition’ a tel tum theuh turin a chah a ni.

Mizoram Kailawn hi Planning & Programme Implementaton Department hnuaiah kum 2017 khan a tum khatna buatsaih niin kum 2018 leh 2019 khan buatsaih chhunzawm a ni a. He inelna kaltlang hian Mizo thlalai eizawnna bultan tum mi 60 lai chu sumfai leh an thiamna tuai-hriam nan Training-te nen tanpui an lo ni tawh thin a ni. ‘Mizoram Kailawn 4th Edition’ hian Mizo-rampum a huam anga, mimal leh pawl angin inelna hi a tel theih dawn a ni.

Dilna hi startupmizoram.com-ah emaw, Phone No. 6909180207-ah emaw August ni 30, 2025 thleng a thehluh theih anga. Dilna luh dan a zirin Presentation thazual 30 thleng thlanchhuah a ni anga, heng thlanchhuahte sum mamawh chu cheng nuai khat (1) thleng puih an ni ang. An hmalaknate tihchangtlun lehzual nan MSUM Research & Development and Market Support Fund atangin cheng nuai hnih (2) thleng dilna an siam thei bawk dawn a ni.