Thla li chhungin chhiah Vbc. 494.96 hmu tawh

Mizoram sawrkara Taxation Department-in kumin (2025-26) April-July chhunga chhiah a hmuh tawh zawng zawng zat chu Rs. 4,94,96,56,882 a tling a, heng zingah hian kawng siamna tur, ‘Road Maintenance Cess’ a hmuh pawh Rs. 22,56,01,053 a tel a ni.

Taxation Department tarlan danin, kumin sawrkar kum kal meka thla li (4) chhunga chhiah an hmuh tawh zawng zawng Rs. 4,94,96,56,882 zingah hian Rs. 3,30,18,00,723 chu GST atanga hmuh a ni a. Profession Tax atangin Rs. 5,89,26,361 hmuh ni bawkin Sales Tax atangin Rs. 1,13,77,07,692 an hmu tawh a. Heng bakah hian nikum lam atanga sawrkarin Cess a lak thar, Road Maintenance Cess atangin Rs. 22,56,01,053 leh Entertainment Tax Rs. 20,000 hmuh a ni tawh a ni.

Hetihlai hian Taxation Department hian kum kalta, 2024-25 chhung khan Chhiah chi hrang hrang an khawn atangin Rs. 11,49,81,88,170 an hmu a, Sawrkar kum kalta chhung khan April, 2024-ah Chhiah hmuh tam berin hemi thla hian Rs. 1,65,01,97,183 hmuh a ni a, sum hmuh tlem ber thla, September, 2024-ah Rs. 64,91,61,389 hmuh a ni.

Nikum October atanga sawrkarin chhiah thar a lak, kawng siamna tur, Road Maintenance Cess atangin kumin April-ah Rs. 10,17,89,222 hmuh a ni a, May thla-ah Rs. 1,29,50,080, June-ah 82,05,891 leh July-ah Rs. 10,26,55,860 hmuh a ni tawh.