Minister hovin Revenue leh Supply Department hotu ten Serchhip-a thuthar thehdarhtute an kawm
Serchhip DC Meeting Hall-a thuthar thehdarhtute an kawmna ah hian Minister B. Lalchhanzova chuan a chawrchhuahna District ngeiah Independence Day a hmang thei chu hlu a tihzia sawiin, hemi hun hi remchangah hmangin Serchhip District hmasawnna tur ngaihtuah a, thil tangkai tih theih beseiin Revenue leh Supply hotulu te nen an rawn kal tih a sawi a. LR&S leh FCS&CA Department ten Serchhip District leh Mizoram pumpui tana an hmachhawp te puanzarna leh inrawnkhawmna hun remchang atan he hun hi an hman thu a sawi a ni.
He hunah hian Revenue Department-a Commissioner & Secretary Vanlalmawia chuan Mizoram-a Revenue inrelbawl dan chungchang a bul thum atanga a fel loh avangin hmasawn zel turin insiamrem leh tihdanglam tur a tam hle tih a sawi a; “Hma lam pan tur hian a bulah kan let a ngai ta zawk a ni,” a ti. Mipui hnaiha Revenue hotute an awm theih nan thingtlang khaw lian deuhah Village Revenue Official dah an tum thu te, Sub-Division ah Assistant Commissioner ruat an tum thu te sawiin, a bul tan nan Thenzawl leh Vairengte a dah phawt an tum tih a sawi a. Deputy Commission, District Collector te chu Revenue thuneitu sang an nih avangin an thuneihna tihpun an tum dan a sawi a, Mizoram Revenue Amendment Act chu Assembly a pass tura thehluh a nih thu a sawi bawk. Tunlai thiamna hman tangkai an tum dan leh hma an lak mek dan te, Chhiah (tax) pawh e-ram hmangin online a pek theih a nih thu te, Digital Land Record an kalpui mekah GIS Mapping tih niin online in mahni ram chin chiang taka en theih a nih thuai tur thu te a sawi a. Revenue Court System mumal awm lo pawh siam that tumin hma an la a, Revenue Court Manual siam mek a nih thu leh Ram buai chungchangah DC leh ADC te chu First Appellate atan ruat an tum thu te a sawi bawk.
He hunah hian Food, Civil Supply and Consumers Affairs Department-a Secretary Teresy Vanlalhruaii chuan an Department hmalakna leh hmachhawp hrang hrangte sawiin, ruahmanna fel tak siama mipuiin an nitin mamawh a hun tak leh dik taka an dawn theih nan hma an lak thu a sawi a. Retailer te hnenah buk dik taka buhfai leh a dangte an pechhuak ngei tih hriat nan Supply Kudam tinah Digital Weighing Scale dah a nih dawn thu leh August thla chhung hian khawl a lo thlen kim an beisei thu a sawi a. Sawrkar laipui duh dan angin Beneficiary zawng zawngte e-kyc tihfel vek tur a nih thu leh September 30 thleng chauh hun an neih tawh avang leh e-kyc tifel lo ten ration an dawn theih dawn loh avangin e-kyc ti vek tura mipuite chu sawmin, khaw tina VC te pawh tanpui turin a sawm a. Mipuiin thla tira ration an dawn theihna tura tan an lak dan pawh sawiin, khawl lamah harsatna te a awm thin dan te a sawifiah a, Online-a Ration Card dilna siam an tum thu te te pawh sawiin, Supply Minister hmalakna avanga kawng chhe karah pawh buhfai harsat thu hriat tur a awm loh thu a sawi bawk a ni. Hei bakah hian FCS&CA Secretary chuan ration chungchang a ni emaw, an department kaihhnawih engpawh harsatna emaw, zawhfiah duh emaw mipuiin an nei a nih chuan Toll Free No. 1967 leh Mipui Aw-ah te thlen theih a nih thu a sawi a ni.
He hunah hian Serchhip DC Paul L Khuma leh Serchhip SP Gavit Gogna bakah LR&S Director R Lalthazuala leh Department hotu pawimawh te an tel bawk a ni.
Comments
Post a Comment
I ngaihdan i sawi hian mipui ngaihdan i tarlang a ni!