Mipui ten buaina awm lova MUHCS an chhawr tlan theih thuai a beisei thu Minister in a sawi

Mizoram sawrkar in Mizoram Universal Health Care Scheme (MUHCS) Review Committee a din-a Chairman leh Home Minister K. Sapdanga chuan MUHCS chu Mizoram mipuite'n buaina awm lova an chhawr tlan theih thuai a beisei thu a sawi.

Home Minister K. Sapdanga hian Inrinni khan Christian Hospital Serkawn tlawhin BCM hnuaia Medical & Health Department Director Dr. B. Laldinliana leh damdawi In-a thawktute'n lo dawngsawngin an hmalakna hrang hrang an lo hrilhfiah a. Thawktute nen inkawmna an neih ah Home Minister chuan Mizoram sawrkarin mipuite'n damloh nikhuaa inenkawlna tha an dawn theih nan Mizoram Universal Health Care Scheme (MUHCS) a duang tih sawiin, MUHCS-a siamrem leh ennawn ngaite lo zirchiang tura Review Committee dinah Chairman-a ruat a nih angin damdawi In chu tlawh a nih thu a sawi a. Christian Hospital Serkawn chu MUHCS timawitu leh tiphuisuitu hmasa ber, phur tak leh inhawng taka sawrkar thawhpuitu an nih angin an ngaihlu tak zet tih sawiin, BCM Kohhran leh damdawi In-a thawktute chungah sawrkarin MUHCS kaltlangin lawmthu a sawi tih a sawi a. MUHCS chu Mizoram mipuite'n buaina awm lova an chhawr tlan theih thuai a beisei thu a sawi bawk.

Christian Hospital Serkawn hotute chuan MUHCS hnuaia an damdawi In-in bill an neihte chu Mizoram sawrkarin rei rial lovin chawlhkar tin a pekchhuah zung zung thu leh pawisa an dawn that thu sawiin, sawrkar chungah an lawm hle tih an sawi a. Christian Hospital Serkawn hian May ni 21, 2025-ah MUHCS hi hmang tanin, damlo 786 te inenkawlna senso cheng nuai 151.75 chu Mizoram sawrkar atangin an hmulet tawh a. Kar tin chawhrualin cheng nuai 13.2 vel hmu ang an ni a. UD&PA Department kaltlanga damlo awmpuitu mipa leh hmeichhia 5 veve riah theihna tur, 'Patient Attendants Shelter' sa tura ruahman chu buaipui mek a nih thu leh Fur zawh veleh hna tan theih beisei a nih thu tarlan a ni bawk. 

Home Minister hian Mizoram Presbyterian Kohhran enkawl John Williams Hospital pawh tlawhin Medical Superintendent Dr. K. Lalsanga hovin damdawi In-a thawktute'n an lo dawngsawng a, damdawi In an fan kualpui bakah, an hmalakna hrang hrang an lo hrilhfiah a ni. He hunah hian Minister K. Sapdanga chuan damdawi In enkawl chu rawngbawlna pawimawh tak a nih thu sawiin, sawrkarin hmalakna hrang hrang a neihah Kohhran leh mimal damdawi In te'n sawrkar an thlawpna leh thawhpuina a that thu a sawi a. John Williams Hospital-a thawktute chu tha taka sawrkar thawhpui zel tur leh mipui hrisel nan theihtawp chhuah chhunzawm zel tura chahin, duhsakna a hlan bawk.