SWD Minister in Zo Inspiration hmalakna chhuanawm ti

Social Welfare Minister Lalrinpuii chuan Zo Inspiration Foundation (ZIF) te hnathawh chu chhuanawm a tih thu a sawi.

Zo Inspiration Foundation (ZIF) buatsaih, Free Education Programme (FEP) Parents Meet leh Website leh Management Information System (MIS)-te tlangzarhna hun nimin-a Hyve Aizawl City Hall-a neih a hmanpuina ah Social Welfare Minister Lalrin-puii chuan he thu hi sawiin ZIF-te chu Social/Health/Education Sector-a an hmalaknaah sawrkar hmalakna nena kalkawptir (converge) theih a awm chuan sawrkar chu thawhho a inhuam reng tih a sawi a, Lailen Consulting nena thawkho a, inrelbawlna felfai tak nena mi tam zawk an tanpui theihna tur, website (www.zoinspiration.org) leh MIS an siam chu tangkai taka hman a nih a beisei thu sawiin, a hawng a ni.

Minister Lalrinpuii chuan a Department chan Social Welfare Department hmalaknate bakah sawrkarin tanpui ngaite tana hamthatna hrang hrang a duante a tarlang a. Mizoram Universal Healthcare Scheme (MUHCS) kaltlangin cheng vbc. 33 chuang hmangin mipuite damdawi In awm man leh an inenkawlna senso an chhawk zangkhai tawh tih leh sawrkar School-ah uniform leh lehkhabu a thlawna sem thin a nih thu a sawi bawk.

ZIF-te hian Free Education Programe (FEP) hnuaia zirlai an enkawl mek mi 47 nu leh pate leh enkawltute nena inkawmhona hun an hmang zui nghal a. He hunah hian an thawhpui NGO leh sikul hrang hrang - Ephatha Special School, Special Blind School, Gilead Special School leh a dangte an tel bawk a ni.

Nimin-a he hun hman ah hian School Education Department Director Angela Zothanpuii pawhin thu sawiin, Emmanuel Thangrosanga, ZIF Founder & Secy atangin Report leh Introduction ngaihthlak a ni bawk.