Bana Kaih Scheme hnuaia ranvulh thlangtute tan Livestock Insurance sawiho a ni

Mizoram State Policy Coordination Committee chu Bana Kaih Scheme hnuaia ranvulh thlangtute hman tur ‘Livestock Insurance’ kalpui dan tur ngaihtuahin nimin khan an thukhawm.

Planning & Programme Implementation Committee Room-a thutkhawm hi MSPCC Vice Chairman Dr. KC. Lalmalsawmzauva chuan kaihruaiin AH&Vety Minister C. Lalsawivunga chuan he hun hi a telpui a. He thutkhawm ah hian Mizoram chhunga ran, a bik takin Vawk vulhtuten African Swine Fever (ASF) natna leng thin avangin harsatna nasa tak an tawh thin thu tarlan niin, he natna laka ran an him theih nan Animal Husbandry & Veterinary Department chuan theihtawpa hma an lak thu ngaihthlak a ni a. Mizoram Sawrkar Flagship programme, Bana Kaih Scheme kaltlangin Vawk vulha bultan tum dilna 2,518 a awm thu tarlan a ni. Ranvulh tura hmalak tumte dilna leh ruahmanna kalpui tum dante uluk taka zirchian thin a nih thu pawh he hunah hian tarlan niin, Bana Kaih Scheme hnuaia hmalakpui tlak thlanchhuah ten thlamuang taka ran an vulh theih nan ‘Livestock Insurance’ tha neih a pawimawh thu sawilan a ni bawk.

He hunah hian SBI General Insurance Co. Ltd., National Insurance Co. Ltd., United India Insurance Co. Ltd., New India Assurance Co. Ltd., IFFCO- TOKIO General Insurance Co. LTD., Agriculture Insurance Company of India Ltd. leh Partner Bank-a thawktute pawh telin Insurance Company hrang hrang kalkhawmte hian ‘Livestock Insurance’ an lo kalpui thin tawh dan leh Mizoram-a Vawk ‘Insuarance’ tha taka kalpui a nih theih nana ruahmanna an neih dan te an tarlang a. National Insuarance Co. Ltd. tarlan danin kum 2024-25 chhung khan Bawng 1,10,000 leh Vawk 62,000 vel insurance an lo tih sak tawh a ni. Insurance Company-te hian ‘Livestock Insurance’ tha taka kalpui a nih theih nan ran chhinchhiahna ‘Ear Tag’ neih a tul thu te, vaccine pek ngei a ni tih nemnghehna te leh thuneitute atangin ‘Animal Death Certificate’ thehluh tel a tul thute an tarlang a ni.

MSPCC hova Insurance Company-te thutkhawm hnu hian Implementing Department-a Nodal Officer leh Partner Bank-te nen Bana Kaih Scheme hnuaia dilna thenkhat ennawn ngaite ennawnin hun hman chhunzawm a ni.