State Child Welfare and Protection Committee thukhawm

State Child Welfare and Protection Committee chu nimin khan an Chairman leh Social Welfare & Tribal Affairs, Women and Child Development Department Commissioner & Secretary ni bawk Lalzarmawi hovin an thukhawm.

He thutkhawm SAD Conference Hall-a neih hi Social Welfare Minister Lalrinpuii chuan hman-puiin naupang humsual daite leh vanduaina tawk te tanpuitu SCW&PC hnathawh chu ropui a tih thu a sawi a. Thawktute inpekna chu fakawm a tih thu sawiin, an enkawl lai naupangte piah lamah thawktute pawh chu chhawmdawl leh sawrkar ang pawha duat ngai tak an ni tih a sawi a. SCW&PC-in Zoram mipuite tana a hnathawh ropuizia chu hre reng a, theihtawp chhuah chhunzawm zel turin kalkhawmte chu a chah nghal bawk.

Nimin-a State Child Welfare & Protection Committee thutkhawm hian Department hrang hrang aiawhte pawh telin Mission Vatsalia leh Juvenile Justice Fund chungchangte an ngaih-tuah a. He thutkhawm ah hian kumin April - June inkarah Child Helpline leh Women & Child Development Control Room-a harsatna thlen mi 1512 an awm thu tarlan a ni a, heng mi 1512 ten naupang chunga hleilenna leh harsatna thleng avangin Child Helpline leh Women & Child Development Control room an biak atang hian thubuai 430 an ziaklut a ni.

Child Welfare Committee-in kum 2024 atanga kumin kum kal mek 2025-a naupang venhim leh enkawl ngai bikte thubuai ziahluh ngaih-tuah tura chhawpchhuah thubuai 1651 zingah thubuai 1573 chu chinfel a ni tawh tih tarlan a ni bawk a, tunah hian thubuai la chinfel loh 78 an nei mek bawk. Naupangte chunga hleilenna leh hursualna avanga POCSO Act hnuaia thubuai ziahluh pawh kum 2024 leh 2025 inkarah 480 a awm bawk a ni.