Prime Minister in PM-KISAN tanpuina semin Serchhip atang pawhin lo zawm ve a ni

Prime Minister Narendra Modi chuan Inrinni khan PM-KISAN Samman Nidhi hnuaiah India rama kuthnathawktu vbc. 9.70 te hnenah cheng vbc. 20,500 a semchhuak a, Mizoram-a kuthnathawktu mi 1,31,238 te hnenah Rs. 38,06,86,000/- semchhuah a ni.
Prime Minister Narendra Modi hian India rama kuthnathawktute tuamhlawmna Scheme pui ber, PM-KISAN Samman Nidhi hnuaia tanpuina 20th Installment hi Uttar Pradesh-a Varanasi atangin Direct Benefit Transfer kaltlangin a semchhuak a, he hun hi Mizorama District hrang hranga District Agriculture Office leh Krishi Vigyan Kendra (KVK) atangin biakhmuh theihna kaltlanga lo chhim a ni a. State Level programme chu KVK Aizawl, Selesih-ah hman niin he hun hi Environment, Forest & Climate Change Minister Lalthansanga chuan Khuallian niin a hmanpui a ni. He hunah hian Minister Lalthansanga chuan Mizorama kuthnathawktu tam takin PM-KISAN kaltlanga sawrkar laipui tanpuina an dawng thin chu lawmawm a tih thu sawiin, Scheme-in a tum leh a beisei ang ngeia tangkai taka hmang turin hamthatna dawngtute a chah a. State sawrkar flagship programme Hand Holding Scheme Phase-2 hnuaiah kut hnathawktute tan Online application dil theih a nih thu a tarlang bawk.

He Programme hi Serchhip-ah pawh DAO Office atanga lo zawm ve niin Agriculture Department-a thawktute leh PM-KISAN hnuaia tanpuina dawngtu kuthnathawktute an tel a, hemi rual hian Serchhip District atanga PM-KISAN hnuaia tanpuina dawng turte hnenah tanouina an dawn tur hi semchhuah nghal beisei niin Serchhip District atanga tanpuina dawng zat chiah hi hriat theih ala nih loh thu DAO Office-a thawktute chuan an sawi a ni.

PM Kisan Scheme hi kum 2019 atanga bultan niin, Mizoram-ah pawh Agriculture & Farmers' Welfare Department hmalaknain kalpui chhunzawm zel a ni a. He Scheme hnuaiah hian kuthnathawktute'n tanpuina kum khatah Rs 6,000/- an dawng thin a, he sum hi installment thumin Rs 2,000/- zela pekchhuah thin a ni a. Tun tuma PM-KISAN 20th Installment sem chhuahnaah hian Mizorama kuthnathawktu mi 1,31,238 te hnenah avaiin Rs. 38,06,86,000/- semchhuah a ni a, hei hi kum 2025-26 Financial Year chhunga installment hmasa ber a ni.

PM-KISAN Scheme-ah hian sawrkar hnathawk emaw, pensioner awm lohna (Group D tiam lovin) kuthnathawk chhungkua atangin mi pakhat zel inziahluh theih a ni a. A dawng tlak ngei te'n hamthatna hi an dawng a, la inziaklut lo tan pawh a inziahluh theih reng a ni. Hrechiang duh tan Directorate of Agriculture & Farmers' Welfare, Tuikual South, Aizawl leh mahni awmna District-a Agriculture Office hrang hrangahte office hun chhungin a zawhfiah theih reng a ni.