MZU mi ten Nungcha chi thar 37 hmuchhuak tawh

Mizoram University Department of Zoology-a thawk Prof. HT Lalremsanga leh a thawhpuite chuan tunhnai khan India hmarlam (J&K leh Himachal Pradesh) ah 'Ramdaidep' chi thar an hmuchhuak a, Meghalay State-ah 'Dawngthlek' hmuchhuak bawkin Prof. HT Lalremsanga ho hian rannung/thlai (spieces) thar 37 hmuhchhuah a ni tawh a ni.

Zawhna chhangin Spieces hmuhchhuah thar chu a tangkai dawn tih Prof. HT. Lalremsanga chuan, “Species thar hmuhchhuah hian ram bungkhat a nungcha/thlai hausakna a tichiangin, Researcher te tan hun kal zel atan an tangkaina zirna turin kawng pawimawh tak kawhhmuhtu a ni a. Hei hian thilnung te an DNA, pianphung (morphology) leh khawsak duhna (ecological habitat) leh khawsakphung (ecological niche) te chiang takin a hriat theih a. Hei vang hian conservation lamah pawh hmalak dan tur nasa takin a tanpui a. Khawvel a nungcha chi hrang hrang ngah ram biodiversity hotspot te hian research, project leh ecotourism lam thlengin a pui nasa a ni,” ti. 

Mizoram chhunga speices thar an hmuhchhuah chuan hnamdang beng a verh tih sawi bawkin, “Mizoram a kan species hmuhchhuah Rul, Uchang leh Daidep thenkhat kan hmuhchhuahna hmun hmingchawia kan lo phuah tawh Blythia Hmuifang, Leptobrachella Tamdil, Cyrtodactylus Bengkhuaia (Sailam ami) leh a dang te hian tourist te bengverh in a hmun tlawh ngei duhna rilru te a siamsak thin a. Chubakah new species hmuhchhuah hi scientific khawvelah chuan achievement ropui ber te zing a ngaih a ni,” a ti bawk a. Thil an zirchianna atanga an hmuhchhuah tharte khawvelin a pawmpui em? tih zawhna chhangin, “Species thar hmuhchhuah chanchin kan zirchianna kan ziah te hi khawvel top scientist hetiang lama expert engemaw zat te'n lo endikin zawhna leh siamthat ngai vawi engemaw zat an rawn siam thin a. Hetianga a kual a kual hnuah hian publish tlak a an ngaih hnuah Scientific Journal in a rawn published ta thin a ni. Chuvang chuan khawvelin a pawmpui mai bakah website, generate bank leh biodiversity data ah te midang hmuh ve theih turin record zel an ni thin,” a ti.

Prof. HT Lalremsanga leh a thawhpuite hian Jammu & Kashmir leh Himachal Pradesh-a herpetological expedition an neihna atangin Ramdaidêp, Cyrtodactylus (Bent-toed Gecko) species thar pahnih an hmuchhuak a. An hmuhchhuahna hmun hmingchawiin an hming ah Cyrtodactylus himachalensis leh Cyrtodactylus shivalikensis tih phuahin July ni 22, 2025 khan International Scientific Megajournal, Zootaxa vol.5665-ah chhuah (published) a. Meghalaya State-ah Dawngthlek species thar pahnih hmuchhuakin an hmingah Khasi tawnga 'Uchang' leh chaw lar 'Jadoh' hming chawiin ‘Raorchestes jakoid’ leh ‘Raorchestes jadoh’ tiin an phuah a. July ni 26, 2025 khan International Scientific Journal, Journal of Threatened Taxa vol.17-ah chhuah a ni bawk.