Serchhip Sub-Hqrs. YMA Hall sak thar SWD Director in hawngin YMA kut-ah a hlan

Serchhip Bazar-a Sub-Hqrs. YMA Office Building chhawng sak belh, ‘Sub-Hqrs. YMA Hall’ tia hming vuah chu nimin khan Social Welfare Department-a Director Dr. Lalhriatzuali Ralte chuan hawngin he Building sak thar hi Serchhip Sub-Hqrs. YMA kutah hlan nghal a ni.

Serchhip Sub-Headquarters YMA Hall hawnna hunah hian Social Welfare Department Director Dr. Lalhriatzuali Ralte chuan Serchhip Sub-Headquarters YMA ten Hall thar tha tak an nei chu lawmpuiin, sawrkar atanga an sum hmuh te daihzai leh tangkai takin an hmang tih an Building atangin a hmuh theih nia a hriat thu a sawi a, a building sak hna a hlawhtlinna atana thawktu zawng zawngte fakawm a tih thu a sawi a. Kohhran, YMA leh sawrkar thawhhonaa ruihhlo ngaite enkawlna Hulhliap Short Stay Centre chungchang sawiin, a hlawhtlinna tura YMA te tangkaizia a sawi a, an tel lovin a hlawhtling dawn lo tih sawrkarin a hmu chiang hle a ni, a ti a. Mizoram siamtha tura Social Welfare Department hmalakna leh hmachhawp hrang hrangte Director hian sawi bawkin, Serchhip Sub-Headquarters YMA ten ruihhlo dona atana an hman turin Social Welfare Department hmingin Rs. 10,000 a hlan bawk a ni.

Serchhip Sub-Hqrs. YMA President Kawlthuama kaihhruai he hunah hian Central YMA President Lalhmachhuana pawhin Building thar an neih chungchangah Serchhip Sub-Headquarters YMA a lawmpui thu leh hma an sawnzia tilangtu a ni tih a sawi a. Tunhnaiah Assam State in an State-a dan lova Bangladesh mi lut te hnawhchhuah hna a kalpui mek chungchang ah leh raltlan chungchangah fimkhur a ngaihzia sawiin, ruihhlo do kawngah tanlak a ngaih thu leh theihtawp chhuah turin YMA member te a sawm bawk.

Nimin-a he hun hman ah hian Serchhip Addl. DC Lalrinzuala pawhin Serchhip Sub-Hqrs. YMA te a lawmpui thu sawiin, sawrkar Department te leh Serchhip-a tlawmngai pawl hrang hrang ten thawhhona tha tak an nei chu lawmawm a tih thu a sawi bawk a ni.

Serchhip Sub-Hqrs. YMA Building zauhna, Vertical Extension hi August 7, 2023 khan khatih hunlaia Social Welfare & Tribal Affairs Minister Er. Lalrinawma’n Serchhip Sub-Hqrs. YMA te dilna pawmsakin, India Danpui Article 275 (1) hnuaia Tribal mite tana hmasawnna sum Grant-in-Aid a pek cheng nuai 98 hmangin hmanga sak a ni a, kumin May 16 khan sak zawh niin luah theih tura peihfel a ni a, a chhungah hian mi 230 vel thu theiin a chhunga bungraw mamawh hrang hrangte pawh dah nghal a ni bawk.

Sub-Hqrs. YMA Serchhip hi June 18, 2008 khan hawn niin tuna an Office Building March 5, 2015 khan khatihlaia Chief Minister Lal Than-hawla chuan a lo hawng tawh a, tuna an sum hmuh hmang hian a hmaa Building awm sa pawh hi nasa taka thuamthat a ni bawk a. Tunah chuan he Building hi Mizopa chhiara chhawng 5 niin Office bakah Meeting neihna atana hman theih Room hrang hrang a awm bawk a ni.

Serchhip Sub-Hqrs, YMA huamchhung ah hian Group YMA pathum - Vantawng, Tawitlang leh Tuichangral South Group YMA te awmin YMA Branch 74 a awm mek a, Member 38,909 an awm mek bawk a. Serchhip Town chhung bikah YMA Branch 21 a awm a ni.

Nimin-a Sub-Hqrs. YMA Hall thar hawnna hunah hian Serchhip Sub-Headquarters YMA Secretary Zonunsanga Kawlni leh Finance Secretary H. Lalbiakhlua ten he Building an sak dan leh an hmalakna hrang hrang te an report a. Serchhip SP Gavit Gogna bakah Serchhip District chhunga sawrkar hotute, Central YMA hruaitute, khawtlang hruai-tute leh tlawmngai pawl hrang hrang hruaitute pawhin he hun hi an telpui a ni.