Mizoram State Capital Aizawl a ruk a sawn tumna sawifiah turin Chief Minister ngen
MNF Party chuan Mizoram State Capital Aizawl a ruk a sawn tumna sawifiah tura Chief Minister chu ngenin, ZPM in sawrkarna an chan atangin Mizoram chu a hnungtawlh zawng hlirin a kal niin an sawi a, Kawngchhia avanga Mizoram harsatna tawh chungchang ah mawhphurtu dik tak chu Chief Minister leh PWD Minister niin an sawi bawk.
MNF Party chuan nimin khan Aizawl Mizo Hnam Run-ah Chhung Inkhawm neiin he hunah hian General Secretary Zodinpuia chuan sawrkarin Peace City Project a buaipuina ah thuzep ruk lian tak a nei nia sawiin, “Chief Minister Pu Lalduhoma hian sawrkar laipui-a sum dil nan Mizoram State Capital Aizawl chu sawn turin ngenna a lo thlen reng a, hei hi Vawiin thengin Mizoram mipui hmaah a zep tlat a ni,” a ti a. “Kumin 2025, April ni 24 khan Seema Rani, Section Officer (AMRUT-IIB), MoHUA, New Delhi chuan Chief Secretary leh Resident Commissioner, Mizoram hnenah, ‘Shifting of State Capital from Aizawl to Thenzawl, Mizoram’ tiin DPR siamna tur chungchang lehkha a thawn a. Hei bakah hian sawrkar lehkha kan hmuh theih hrang hrangah Mizoram State Capital Aizawl sawnna tur thu hi a chuang a ni. Hemi chungchang ah hian Chief Minister-chuan Aizawl khawpui tawt lutuk tihziaawmna tura ‘Peace City’ din tum a nih thu bak hi mipui ah puanzar a la nei lo a, Mizoram leh Aizawl mipui rawn na neilo a Mizoram State Capital Aizawl a ruk a sawn tumna lo awm reng hi sawifiah ngei turin Chief Minister ka ngen a ni,” a ti bawk.
Hei bakah hian nia sawi bawkin MNF General Secretary chuan, “Sum puk leh ramchhung mipuite atanga Chhiah lak bak hmundang atanga Mizoram hmasawnna tur dapchhuah ngaihna a hre lo. Kum 2023 December ni 8-a ZPM sawrkar lakluh a nih atangin RBI ah cheng vbc. 4233.49 a puk tawh a, hmundang (NABARD, EAP, SASCI, NDCDC) atangin cheng vbc.2191.25 zet an puk tawh bawk. Kumkhat leh a chanve chhung lek a ZPM sawrkar sum puk hi cheng vbc. 6424 leh nuai 74 a tling tawh. Thla tin nuai 35693 puk reng ang a ni,” a ti.
Kawngchhia avanga Mizoram harsatna tawh chungchang ah mawhphurtu dik tak chu Chief Minister, Finance Department changtu leh PWD Minister an nih thu pawh Zodinpuia chuan sawiin, “State dang a thil thleng nise chu mipuiin a mawh-phurtute hi bang turin an nawr nasa tawh hle ang,” a ti a. “Thal hun chhung zawng Mizoram sawrkar enkawlna hnuaiah NH-06 (Kawnpui - Khamrang) a awm a, Furpui intan tawh hnu July ni 7-ah NHIDCL kutah Mizoram sawrkarin a hlan ve chauh a ni. Kawngchhia avanga nitin a inhlawhfa miharsa zawkten hnathawh tur an neilo rei tawh a, an dinhmun hi ngaihtuah a ngai tawh hle,” a ti bawk.