Serchhip khawpui chei mek

Serchhip Beautification Project hmalakna kal mekah Serchhip khawpui chhung hmun hrang hranga ‘Road signage’ siam hna chu thawh chhoh mek a ni.
UD&PA Department bultuma 'District Beautification Competition 2025' neih ah Serchhip District in lawmman a lak hmangin Serchhip District Beautification Committee chuan Serchhip khawpui cheina atan hma an la mek zel a, he hmalakna hnuaiah hian Serchhip khawpui chhung hmun pasarih (7)-ah ‘Road signage’ siam tum niin heng te hi kawng pengthuam tamna hmunah dahin mipui ten awlsam taka an kalna tur lam an hriat theihna tura ruahman a ni a, a hmasa ber atan nizan hmasa khan New Serchhip College Peng-ah siam zawh a ni a, nimin khan Serchhip IOC Veng-a DC Office peng-ah siam tan leh nghal a ni bawk.

Thudawn danin ‘Road signage’ hi hmun 7-ah siam tum niin tuna an siam tawh pahnih te bakah hian Serchhip IOC Veng-a Police Station peng ah te, AOC Veng pengthuam, Ser-chhip P&E Veng-a High School peng bakah Chhiahtlang-a By-Pass junction-ah te siam leh a ni dawn a, Serchhip Bazar-a dah tum erawh a hmun chungchang ah harsatna a awm avangin thulh leh a ni thung nia thudawn a ni bawk.

Serchhip Beautification Project hnuaiah hian hmalakna tur hrang hrang ruahman niin heng te chak taka bawhzui mek zel a ni a, Serchhip khawpui chhung hmun hrang hrangah thingtiak phun niin mipui ten him taka kawngpui an kan theihna tur ‘Zebra Crossing’ engemaw zat siam a ni tawh a. Khawtetlang-a Community Garden siam tura hmalak a nih bakah Helipad tlang-ah Public Park siam a ni a, Serchhip Bazar-ah mipui ten tui in tur an dawh theihna tur siam tura hma-lak mek niin New Serchhip North leh Serchhip Bazar-ah Fountain siam tum a ni bawk a. Heng bakah hian hmalakna dang tam tak awmin heng hmalakna te hi zah tur leh a hlawhtlinna tura theihtawp chhuah turin mipuite chu ngen an ni.