Hrangturzo Bialtu MLA lei X-ray khawl hman theih ta

Hrangturzo Bialtu MLA Lalmuanpuia Punte chuan MLA (LAD) Fund atanga lei X-ray khawl te hman theih a nih tawh avangin lawmthu a sawi.
Hrangturzo Bialtu MLA leh Adviser to Chief Minister Lalmuanpuia Punte hian a MLA Fund hmangin a Bial chhunga awm Biate CHC, East Lungdar PHC leh North Vanlaiphai CHC-ah te X-ray khawl thar a lo leisak tawh a, heng X-ray khawl leite hi bun niin July 23-ah Biate CHC, July 24-ah East Lungdar PHC leh July 25-ah North Vanlaiphai CHC te chu bunfel niin hlawhtling takin X-ray pawh tih nghal a ni a. Thil tih ngai hrang hrang harsa tak tak a awm avangin install mai theih loha a awm hnuah Health Minister Lalrinpuii te, Health Commissioner H. Lalengmawia IAS bakah Health Department lama thawktuten harsatna tam tak su tlanga chak taka hma an lakna avangin tunah hian install zawh niin hman theiha peihfel a nih thu sawiin, Health Department lamin ngai pawimawha harsatna tam tak paltlanga X-ray khawl bunfel a nih theih nana thawktu zawng zawngte chungah lawmthu a sawi bawk a ni.

Hrangturzo Bialtu MLA hian a Bial chhunga CHC pahnih leh PHC pakhata X-ray khawlte hi rei tak a chhiat tawh avangin accident tawk leh damlo X-ray ngai ten Serchhip leh Khawzawl an pan zel a ngaih thin avangin Campaign laia a lo intiam tawh ang ngeiin a hmaa an neih sa X-ray khawl chhe tawh aia khawl tha zawk, MLA Fund atangin X-ray khawl thar 300 MAH a leisak a ni.