Serchhip-ah I-Day Table Tennis inelna khelh tan a ni
Independence Day Table Tennis Tournament 2025 hi Bawrhsap Paul L. Khuma chuan khuallian nia hawngin Serchhip District Table Tennis Association chu infiamna lama Serchhip District tihmingthatu leh chawisangtu an nih avangin chhuanawm a tih thu a sawi a. Tournament khel turte chu theihtawp chhuah tura fuihin, tluang taka Tournament an khelh theih nan duhsakna a hlan a ni.
Nimin-a he Tournament hawnna hun hi SCDTTA President VL. Chanchinthahrilmawia chuan kaihruaiin Secretary Lalzuiliana chuan report a pe a. Tunhnaia an hmalakna leh inelna hrang hranga an hlawhtlinna te tarlangin, SCDTA-ah hian Affiliated Club/Association 10 an awm a. SCDTTA mi pali (4) te chu Khelo India State Centre of Excellence, Goa-ah lut tura tlingin tunah hian training an nei mek a. Mizoram Table Tennis Association (MTTA) leh Ultimate Table Tennis te tangdun buatsaih UTT Academy, Aizawl-a lut turin mi pahnih tlingin Training an nei mek bawk a ni.
Nimin-a khelh tan Independence Day Table Tennis Tournament 2025-ah hian category 13-ah inelna neih tur niin infiammi 111 ten tel turin hming an pelut a. Vawiin hian Final khela zawhfel tum niin naktuk ah lawmman sem a ni ang.