DRDO Project Director leh MJA te inkawm

Serchhip District Rural Development Office (DRDO)-a Project Director Malsawmtluanga Fanchun chuan nimin khan MJA Serchhip District Member-te chu inhmelhriatna neih pahin a Pisa-ah thingpui a inpui. MJA Member-te nena an titihonaah hian DRDO Project Malsawmtluanga Fanchun chuan MJA member-te chu an Department hmalakna chungchanga mipuiin an hmuhdan nia an hriatte zawtin, MJA member-te chuan tun dinhmunah an thawk tha viau nia an hriat thu an sawi a, ni 100 inhlawhna tia sawi, MGNREGA chungchanga harsatna awmte leh kalphung thar kalpui dan turte sawilan a ni a. Tunhnaiah Kristian te ni serh, Pathianni-ah inhlawhna atana thlalak ngai chungchang ah hetiang thil hi thleng nawn tawh lo tura an ngaih thu an sawi a. MGNREGA hnuaiah hian tunhnaiah VEC hrang hrangte nen tangtlangin Serchhip by-pass Road huamchhung kawngpui kam-ah thingtiak sang khat vel zet leh Serchhip khawpui chhung kawngpui dung ah te pawh thingtiak an phun thu te a sawi bawk a ni.

Thingtlang lama mirethei Insak tanpuina, PMAY (G) kaltlanga hmalaknaah Serchhip District chu a titha lo zingah an tel thu sawilan niin, hei hi Insak tanpuina First instalment dawng tawh zingah hma la chhunzawm lo an tam vang a ni tih sawilan a ni a, hetihlai hian MzSRLM hnuaiah erawh Serchhip District hmalakna chu a tha viau thung tih sawilan a ni bawk.