New Serchhip BC an che tha
July 29, 2025 atanga Mizoram State Sports Council (MSSC) Golden Jubilee ni pah fawma buatsaih ‘NEXA Aizawl Yonex-Sunrise MSSC Golden Jubilee Celebration MBA Junior Official Championship 2025’ hi Zirtawpni khan Mizoram Badminton Centre, Zuangtui-ah khelh zawh a ni a, he intihsiakna ah hian Category hrang hrang 16-ah inelna neih niin player 185 zet telin Serchhip atanga kal Badminton thiam te an che tha hle a, player 13 inlan ten lawmman chi hrang hrang an la a ni.
He intihsiakna ah hian Under-19 Boy's Singles-ah New Serchhip Badminton Club tana khel mek Malsawmhlua S/o Albert Lalnunhlima, P&E Veng chuan NSBC tana khel bawk Vanlalmalsawmzuala chu hnehin a champion a, anni pahnih hi tunhnai lawka khelh MBA Senior Tournament-ah khan Final-ah inhmachhawnin Vanlalmalsawmzuala hi a lo chak tawh thung a ni. Malsawmhlua hian tun tumah hian intihsiakna pathum ah Champion nihna hauhin Under-19 Boys Single, Under-19 Boys Dobles leh Under-17 Boys Singles-ah te a Champion a, Vanlalmalsawmzuala hi Under-19 Boys Doubles-ah Malsawmhlua nen hian an Champion bakah Under-19 Boys Singles-ah pahnihna a ni bawk.
Under-15 Boys Doubles-ah NSBC-a khel V. Lalhmingmuanpuia leh a tanpui V. Vanmalsawma (CTBC) te tangdun chu an Champion a, Abrahama Lalnunthara S/o Lalrema, Kawnpui ‘S’ chuan Gold pahnih lain Under-13 Boy's Singles-a a Champion bakah NSBC tana khel bawk Bruno Lalchhanchhuaha S/o John Lalnunthara, Serchhip Venglai nen Under-13 Boy's Doubles-ah an Champion a, Under-15 Boys-ah Lalhriatpuia nen pathumna an la bawk.
Hmeichhe inelna lamah NSBC tana khel Lalruatkimi D/o R. Lalrem-ruata New Serchhip chuan Under-11 Girl's Singles Final-ah a khingpui hnehin a Champion a, Under-13 Girl's Doubles-ah Lalruatkimi hi Lalthakimi D/o Lallianmawia, Serchhip P&E Veng nen tandunin an Champion bawk a, Lalthakimi hi Under-13 Girl's Singles-ah Champion bawkin Under-15 Girl's Singles-ah pathumna a ni bawk a. Lalruatfeli D/o Nicky, Chhiahtlang chuan Under-15 Girl's Singles leh Under-15 Girl's Doubles-ah pathumna lawmman a dawng ve ve bawk a ni.
Tun tum inelna ah hian New Serchhip Badminton Club te hi Club mal-a lawmman dawng tam ber an ni.
Comments
Post a Comment
I ngaihdan i sawi hian mipui ngaihdan i tarlang a ni!