MZU NAAC A+ Grade hmuh lawmna Larsap in hmanpuiin MZU e-Office Portal a tlangzarh

Zonuna Kawlni (LENKAWL) • August 6, 2025 • Comments • Mizoram

Mizoram University (MZU)-in National Assessment and Accreditation Council (NAAC) A+Grade (CGPA 3.30) a hmuh lawmna chu nimin khan neih niin Larsap General (Dr) Vijay Kumar Singh chuan khuallian niin a hmanpui a, MZU e-Office Portal a tlangzarh nghal bawk.

MZU Auditorium-a he hun hman ah hian MZU Chief Rector leh Governor General (Dr) Vijay Kumar Singh chuan MZU in NAAC A+ Grade a hmu thar chu a lawmpui thu sawiin, University la naupang tak kum 2000 a din, 2001 a kalpui tan MZU in hun reilote chhunga hlawhtlinna hrang hrang a hmu leh India hmarchhak bakah ram puma zirna In tha zinga chhiar tel a ni chu chhuanawm a tih thu a sawi a. NIRF-in India ram University thazual a thlanchhuah Top 100 zinga MZU a lang pha char char leh tunhnaia 77-na dinhmun a hauhte, Central University bik inelna IIRF tehnaah 15-na dinhmun a hauh phate chu chhuanawm a tih thu a sawi a. Hmasawnna tur tam tak a la awm thu leh endikna neih leh hunah tun aia result tha zawk neih ngei a beisei thu sawiin, tumna tak tak neia hmasawnna lian zawk kan ngaihtuah phawt chuan hlawhtlinna kan chang thei a ni, a ti bawk.

Larsap chuan MZU in hmasawnna a hmuh hrang hrangte tarlangin, National Education Policy 2020 leh Academic Bank of Credits tha taka kalpui a ni te, Research Publication-ah h-index 98 a hmu leh patent 46 lai a nei te, MOOCs leh SWAYAM hnuaia hmarchhak State zinga Online Course kalpui hmasa ber a ni thei leh DRDO Industry-Academia Center of Excellence nei chhun a ni te chu fakawm a tih thu a sawi a. Vohbikte tana nelawm leh leilung leh nungchate humhimna tha tak Campus an neite, zirna piah lama hmalakna nung tha tak tak an kalpui thinte chu lawmawm a tih thu sawiin, India ram hmun hrang hrang bakah ramdang 15 atanga zirlai 43 lai an nei chuan zirna tha tak a nih zia a lantir thu a sawi a. Zirnain a tum ber khua leh tui tha leh hruaitu tha chherchhuah kawnga tanlak a tul thu sawiin, zirlai leh zirtirtute chu taimakna leh tumruhna hmanga University chawisangtu nih tum turin a fuih bawk.

Nimin-a he hun hman ah hian MZU Vice Chancellor Prof. Dibakar Chandra Deka chuan India rama Central University 56 atanga NAAC A+ Grade dawng thei tlemte zinga MZU a tel thu sawiin, hlawhtlinna nei tura tha thawktu zawng zawngte chungah lawmthu a sawi a. A+ grade chuan mawhphurhna nasa tak a kengtel tih sawiin, hnung tawlh lova A++ grade hmu ngei thei tura tanlakpuiah kalkhawmte a sawm a ni.