Mipui ten hamthatna an hriat a pawimawh thu sawi

Cooperation Minister PC. Vanlalruata chuan Sawrkar in mipuite hamthatna a ngaihtuah reng tih sawiin, heng hamthatna te hi mipuiin an hriat a pawimawh hle thu a sawi.

National Cooperative Development Corporation (NCDC) hnuaia Laxmanrao Inamdar National Academy for Cooperative Research (LINAC) hnuaia Regional Training Centre (RTC) huaihawta nimin-a Cham-phai-a ‘District Level Awareness Programme on PMMSY, FIDF & LIFIC’ a hmanpuina ah Cooperation Minister chuan Cooperative chu Mizoram-ah tih tama thuamchak an ngaih hle tih sawiin, Cooperative society te hi khawtlang leh ram hmasawnna atan leh hnam chawikanna atan rahbi pawimawh tak a ni tih a sawi a. PMMSY Scheme hian Sangha tam zawk tharchhuah a tum thu leh Ministry of Fisheries, Animal Husbandry and Dairying hnuaia Scheme lian tak a ni tih sawiin, sum lakluhna tha leh Sangha hmanga eizawnna neite chawikanna pawimawh tak a ni tih a sawi bawk.

Cooperation Department hmalakna hrang hrang pawh Minister chuan sawiin, mipuiin an hriata an hman tangkai ngei a duh thu a sawi a, Cooperative Society te an inlungrualin an thawkho tha a, dik tak leh rinawm taka thawh-hona a awm theih chuan an inchawisan ngei a rin tlat thu a sawi bawk.

Nimin-a he training-ah hian hun hmasa lamah Cooperative Department hnathawh leh a thil tum chungchang bakah NCDC hnathawh te, Ministry of Cooperation hmalakna leh LINAC Fisheries Business Incubation Centre (LIFIC) chungchang te zirho a ni a. Hun hnihna ah Cooperative te tana Fisheries Department hnathawh te, Pradhan Mantri Matsya Sampadya Yojana (PMMSY) leh Fish Farmer Producer Organization (FPPO) te tana Scheme hrang hrang leh Scheme dang te zirho a ni bawk.