MSO in Siaha-a DEO leh DPC Pisa kai tur an dang

Mara Students Organisation (MSO) chuan Siaha District-a Education Department hnuaia hna hrang hrang 158 lak tun thlenga result a chhuah loh avangin nimin khan lungawilohna lantir nan Siaha-a District Education Office (DEO) leh DPC Samagra pisa kai tur an dang.

Mara Students Organisation thuchhuah tarlan danin May ni 7 leh May ni 16 inkara interview buatsaih tawh Education Department hnuaia hna hrang hrang 158 lak tura ruahman chu sawrkarin a tihfel har avangin Education Minister hnenah ngenna vawi engemaw zat an thlen tawh tih an sawi a, Minister chuan an ngenna chu August ni 1 hma ngeia chinfel a tiam tih sawiin, tun thlengin thu lawmawm hriat tur a awm loh avangin Siaha DEO leh DPC Samagra Shiksha pisa kai tur an dang tih an sawi.

Thuchhuah tarlan danin MSO chuan an ngenna tih hlawhtlin anih hma chu lungawilohna an lantir tur thu an sawi a, MSO hruaituten Akashvani palai an hrilh danin District Project Co-ordinator, Samagra Shiksha, Siaha hnuaia Early Childhood Care and Education (ECCE) Helpers leh hnaruak hrang hrang 158 hnawhkhahna tur May thlaa Interview neih tawh chu result chhuah vek tawh mahse Village Council By- Election in a barred avanga cancel leh chu tun thleng a result an la chhuah leh loh avangin leh hemi chungchang ah Education Minister Dr.Vanlalthlana hnenah vawi hnih lai lekha thawn hmanga an zualko tawh hnu pawha hmalakna ala awm lo chu hriatthiam harsa an tih thu an sawi a ni.