MNF tan pawm chi a ni lo tih an President in a sawi

MNF President Zoramthanga chuan MNF tan Khawpui sawn tum dan kalphung chu pawm chi a nih loh thu a sawi.

    Nimin-a Mizo Hnam Run Chhung Inkhawm-ah MNF President Zoram-thanga chuan kumin April ni 24 khan Seema Rani, Section Officer (AMRUT-IIB), MoHUA, New Delhi chuan Chief Secretary leh Resident Commissioner, Mizoram hnenah, ‘Shifting of State Capital from Aizawl to Thenzawl, Mizoram’ tiin DPR siamna tur chungchang lehkha a thawn thu leh sawrkar lehkha an hmuh theih hrang hrang ah Mizoram State Capital Aizawl sawnna tur thu hi a chuang tih a sawi a. “Hemi chungchangah hian Chief Minister chuan Aizawl khawpui tawt lutuk tihziaawmna tura ‘Peace City’ din tum a nih thu bak hi mipui ah puanzar a la nei lo a, NGO te leh Party hrang hrang bakah Zoram mipuite pawh rawnna pakhat mah a awm hriat a ni lova. Hetiang thu liantham hi chu Cabinet Meeting thutlukna tal pawh awm tur nia a lan laiin, chutiang chu Zoram mipuite hian kan hrelo a, Kan Chief Minister thil tih dan hi thil nihphung pangngai nilo, mipuite tana pawmpui remchanglo a ni a, MNF tan pawh Khawpui sawn tum dan kalphung chu pawm chi ni lovin, a thalo kan ti takzet a ni,” a ti.