Buhfai, Oil leh Gas dinhmun a tha rih niin sawi

ZPM Party chuan mipui mamawh – Buhfai, Tuialhthei leh Gas dinhmun a tha rih hle niin an sawi.

    ZPM Media Department chuan nimin khan Supply Department Office leh Kudam thenkhatte an tlawh tih sawiin, “Supply Minister Pu B. Lalchhanzova’n chak takin hma a la a; Secretariat leh Directorate nen pheikhai rual taka hma lain, mipuiin Guhfai, Gas leh Tuialhthei te an tlakchham loh nan theihtawp an chhuah a, heng mipui mamawh te dinhmun pawh an ngaihven reng a. Hetianga thawhhona tha tak avang hian Mizoram buhfai chhekkhawl mek dinhmun pawh a tha a, mipui tan thlaphanna tur a awm lo,” an ti a. Tun dinhmuna FCS&CA Kudama buhfai awm zat chu quintal 1,71,704 a nih thu an sawi bawk. Kawng dinhmunin duhthu a sam lo chungin Tuialhthei phurtuten theihtawp an chhuah thu pawh ZPM chuan sawiin, “Gas tak hi chu semchhuah reng a nih avangin stock ang zawng chuan sawi kim vek theih a ni lo,” an ti a, Tuialhthei phurtu Driver fel leh tlawmngai tak takte chungah kan lawm hle a ni,” tiin nimin zingah Filling Station zawng zawng deuhthaw ah Free Sale theih niin report an dawn thu an sawi bawk.